Sam-A Gaiyanghadao មិនទាន់ចាញ់នៅឡើយទេតាំងពីទម្លាក់មកប្រកួតទម្ងន់ strawweight និង គ្រងខ្សែក្រវាត់ពីរទាំង មួយថៃ និង ឃីកបុកសីង ប៉ុន្តែ វីរបុរសរូបនេះបានដឹងថាអ្នកឡើងដណ្ដើមខ្សែក្រវាត់នាប្រកួតបន្ទាប់នឹងគំរាមកំហែងខ្លាំងដល់រូបគេ។
វីរបុរសមួយថៃវ័យ ៣៧ ឆ្នាំនឹងឡើងការពារខ្សែក្រវាត់ ONE Strawweight Muay Thai World Title ទល់នឹងតារាទើបរះ Prajanchai PK.Saenchai Muaythaigym ក្នុងនាមជាគូឯកនៃព្រឹត្តិការណ៍ ONE: BATTLEGROUND ដែលជាការប្រកួតបិទជិតផ្សាយផ្ទាល់ពីកីឡដ្ឋាន Singapore Indoor Stadium ប្រទេសសិង្ហបុរី នៅថ្ងៃសុក្រទី ៣០ កក្កដា ខាងមុខនេះ។
Sam-A ដែលមានកំណត់ត្រាប្រកួតឈ្នះ ៣៧០ ដង ចាញ់ ៤៧ ដង និងស្មើ ៩ ដងក្នុងអាជីព បានឲ្យដឹងថា Prajanchai ជាកីឡាករមានទេពកោសល្យមួយរូប, មានល្បឿនលឿន, និង មានជំនាញប្រយុទ្ធឈរដ៏មានថាមពល។ លើសពិនេះ គេជាតារាវ័យក្មេងថៃដ៏ល្អបំផុតម្នាក់។
Sam-A ទទួលស្គាល់ថា ៖«Prajanchai ជាគូប្រជែងដ៏គ្រោះថ្នាក់មួយរូបនៅទម្ងន់ strawweight ។ គេប្រកួតបានល្អនៅគ្រប់ទឹកទាំងអស់។ គេឆ្លាតណាស់។ គេមានជំនាញល្អណាស់ និងបទពិសោធន៍ក៏ច្រើនដែរ។ រឿងទាំងនេះធ្វើឲ្យរូបគេក្លាយជាកីឡាករប្រជែងដ៏គ្រោះថ្នាក់នៅក្នុងប្រភេទទម្ងន់របស់នេះ»។
«រាល់ការប្រកួតរបស់គេរំលឹកឲ្យខ្ញុំដឹងអំពីវីរបុរស Saenchai និងអំពីវិធីដែលគេចេញក្បាច់នីមួយៗ, មានល្បិចច្រើនទៀត។ ហើយថ្មីៗនេះ Saenchai បានហ្វឹកហាត់ជាមួយ Prajanchai ផងដែរ។ Prajanchai បានរៀនសូត្រ និងស្រូបយកចំណេះដឹងពី Saenchai ច្រើន»។
Sam-A បានគ្រងខ្សែក្រវាត់ឃីកបុកសីងពិភពលោក ONE Strawweight កាលខែធ្នូ ឆ្នាំ ២០១៩ និងបន្ថែមខ្សែក្រវាត់មួយថៃ ONE Strawweight ក្នុងរយៈពេល ២ ខែបន្ទាប់។
នាខែតុលា ឆ្នាំ ២០២០ ម្ចាស់ខ្សែក្រវាត់ពីរបានធ្វើឲ្យតារាមួយថៃលំដាប់ទី១ទម្ងន់ strawweight កីឡាករ Josh “Timebomb” Tonna ដួលរហូត ៣ ដង និងផ្ដួលឲ្យសន្លប់នៅទឹកទី២។
Sam-A រំលឹកថា ៖«នោះជាការឡើងការពារខ្សែក្រវាត់លើកដំបូងរបស់ខ្ញុំក្នុងទម្ងន់ strawweight ។ ខ្ញុំពិតជារំភើប និងភ័យខ្លាចតិចតួច។ ប៉ុន្តែ ពេលខ្ញុំហក់ចូលសង្វៀន ខ្ញុំបានមើលឃើញថា ខ្ញុំធ្វើបានល្អជាងការរំពឹងទុកទៅទៀត។ ពេលខ្ញុំដាល់គេ ខ្ញុំក៏បានដឹងអំពីចំណុចខ្សោយ។ បន្ទាប់មកខ្ញុំបោះកណ្ដាប់ដៃ និងផ្ដួលគេឲ្យសន្លប់តែម្ដង»។
វាលំបាកបន្តិចក្នុងការស្វែងរកចំណុចខ្សោយរបស់ Prajanchai។ កូនសិស្សមកពីក្លិប PK.Saenchai Muaythaigym កាន់កំណត់ត្រាឈ្នះ ៣៣៧ លើក ចាញ់ ៥១ លើក និងស្មើ ៣លើក។ ហើយគេមានប្រវត្តិចេញពីកីឡាប្រយុទ្ធនេះឯង។
ក្រៅពីឈ្នះខ្សែក្រវាត់នៅសង្វៀនល្បី Lumpinee និង Rajadamnern Stadium Muay Thai World Title បុរសវ័យ ២៦ ឆ្នាំឈ្នះខ្សែក្រវាត់ពិភពលោក WBA Asia South Championship ពីរខ្សែក្នុងប្រភេទទម្ងន់ផ្សេងគ្នា។
Prajanchai ត្រូវបានគេចាត់ទុកថាជាកីឡាករអស្ចារ្យម្នាក់ ហើយការពាក់ហ្គង់ទម្ងន់ ៤ អោនសម្រាប់ការដណ្ដើមខ្សែក្រវាត់ World Title ធ្វើឲ្យ កណ្ដាប់ដៃរបស់គេកាន់តែសាហាវមិនខាន។
«ដូចដែលខ្ញុំបានឃើញ អាវុធរបស់គេមិនធ្ងន់ទេ ប៉ុន្តែ ពេលចូលប្រយុទ្ធញាប់ៗ ល្បឿនរបស់គេលឿនណាស់»។ ម្ចាស់ខ្សែក្រវាត់ strawweight បញ្ចេញទស្សនៈបែបនេះ។
«គេមានល្បិច និងតាក់ទិកច្រើនណាស់។ ចំណុចខ្លាំងរបស់គេ គឺ ល្បឿន។ អ្វីដែលខ្ញុំអាចយកឈ្នះគេបាន គឺ វៃចេញពីឆ្វេង កណ្ដាប់ដៃឆ្វេង ទាត់ឆ្វេង ដែលអាចនាំខ្ញុំទៅជោគជ័យ។ ការប៉ះកីឡាករថៃដូចគ្នា មិនងាយស្រួលផ្ដួលឲ្យសន្លប់ទេ ព្រោះគេលឿន និងមានជំនាញល្អ។ វាជាការប្រកួតដ៏លំបាក។ ប៉ុន្តែ បើមានឱកាស ខ្ញុំនឹងចាប់វាឲ្យជាប់»។
ចំណែកកីឡាករប្រជែងខ្សែក្រវាត់បាននិយាយថា ចង្ការបស់ Sam-A គឺជាចំណុចខ្សោយ ហើយគេមានផែនការប្រកួតឲ្យល្អមើលបំផុត។
យ៉ាងណាក្ដី Sam-A មិនយល់ស្របទេដោយលើកឡើងថា ៖«ចង្កាគឺជាសរីរាង្គមួយ ហើយសរីរាង្គកើតចេញពីសាច់។ វាតែងតែរងផលប៉ះពាល់ពេលត្រូវកណ្ដាប់ដៃ។ យ៉ាងណាក្ដី ការនិយាយ វាងាយស្រួលជាងធ្វើអីចឹងហើយ»។
ពេលនេះ ជាពេលដែល Sam-A ត្រូវធ្វើឲ្យ Prajanchai ស្ងាត់ស្ងៀមហើយ។ ម្ចាស់ខ្សែក្រវាត់ ONE World Champion ពីរខ្សែ បានផ្ដួលតារាឆ្នើមៗក្នុងទម្ងន់ strawweight រួចមកហើយក្នុងក្បាច់មួយថៃ និងឃីកបុកសីង។
ប៉ុន្តែ នៅថ្ងៃទី ៣០ កក្កដា នេះនេះ Sam-A ត្រូវបង្ហាញឲ្យច្បាស់អំពីសមត្ថភាពរបស់ខ្លួន និងបំបាត់រាល់ការសង្ស័យទាំងឡាយ។
ម្ចាស់ខ្សែក្រវាត់សង្កត់ធ្ងនបែបនេះ ៖«អ្វីដែលខ្ញុំចង់បង្ហាញ គឺ ខ្លួនខ្ញុំនេះឯង។ អ្នករាល់គ្នានិយាយថា ខ្ញុំចាស់ណាស់មិនអាចប្រកួតបានទេ។ នេះជាភស្ដុតាងរបស់ខ្ញុំ ហើយចាំមើលខ្ញុំនៅតែប្រកួតបាន ឬ អត់ ។ ខ្ញុំត្រូវការបង្ហាញសម្រាប់ខ្លួនឯងនៅក្នុងការប្រកួតនេះ»។