កីឡាករប្រដាល់ Thiago Teixeira ប្តេជ្ញាថានឹងប្រឹងប្រែងជួយផ្សព្វផ្សាយគុនខ្មែរទៅកាន់ពិភពលោក តាមដែលអាចធ្វើទៅបាន។នេះបើតាមការបញ្ជាក់ ក្នុងពិធីសន្និសីទសារព័ត៌មានទាក់ទិននឹងរឿងរ៉ាវស្ថាប័ន WMO ដែលបានដកហូតខ្សែក្រវាត់ ដែលឈ្នះនៅប្រទេសអាល្លឺម៉ង់កាលពីពេលថ្មីៗនេះ។
ក្នុងពិធីសន្និសីទសារព័ត៌មានថ្ងៃទី៨ ខែមេសា ឆ្នាំ២០២៣ នៅសណ្ឋាគារសុខាភ្នំពេញ កីឡាករប្រេស៊ីល Thiago Teixeira ប្រកាសគោលជំហរជាក់លាក់ ថា ខ្លួនស្រលាញ់ប្រទេសកម្ពុជា ស្រលាញ់អ្នកគាំទ្រនៅកម្ពុជា។ លោកថាការប្រកួតនៅម៉ាឡេស៊ីនាខែឧសភាខាងមុខនេះ គាត់នឹងវាយតំណាងឲ្យ គុនខ្មែរ។
កីឡាករ Thiago និយាយថា៖
“កម្ពុជាជាផ្ទះរបស់ខ្ញុំ។ ខ្ញុំនឹងប្តេជ្ញាបង្ហាញគុនខ្មែរទៅកាន់ពិភពលោក។”
បន្ថែមលើនេះទៀតនោះ កីឡាករជនជាតិប្រេស៊ីល ដែលបានរស់នៅប្រទេសថៃអស់រយៈពេល១៨ឆ្នាំ និងបានហ្វឹកហាត់គុនខ្មែររយៈពេល ២២ថ្ងៃ នៅប្រទេសកម្ពុជានោះ ក៏សន្យាថានឹងប្រឹងប្រែងនាំគុនខ្មែរទៅកាន់ប្រទេសកំណើតរបស់ខ្លួនផងដែរ។
គួបញ្ជាក់ផងដែរថា ពិធីសន្និសីទសារព័ត៌មានទាក់ទងនឹងស្ថាប័ន WMO (World Muay Thai Organization) ដកហូតខ្សែក្រវាត់ និងហាមប្រាមកីឡាករ Thiago មិនឱ្យប្រកួតនៅក្នុងព្រឹត្តិការណ៍WMO នេះធ្វើឡើង ក្រោយសម្តេច ហ៊ុន សែន ផ្តល់ប្រាក់ឧបត្ថម្ភ និងគ្រោងស្នើព្រះមហាក្សត្រ បញ្ចូលជាសញ្ជាតិខ្មែរផងដែរ៕
ប្រភព៖ Thmey Thmey