ក្រុមបាល់ទាត់ជម្រើសជាតិក្រោមអាយុ២៣ឆ្នាំរបស់អាល្លឺម៉ង់ បានធ្វើការប្រកួតមិត្តភាពទល់ក្រុមហុងឌូរ៉ាស់ ដើម្បីជាការត្រៀមខ្លួនចូលលេងព្រឹត្ដិការណ៍អូឡាំពិកនៅសប្ដាហ៍ក្រោយនេះ។
យ៉ាងណាមិញ ការប្រកួតដែលស្មើគ្នា ១-១ ខាងលើនេះនៅសល់តែ៥នាទីទៀតទេនឹងដល់ម៉ោងបញ្ចប់ទៅហើយ ក៏ស្រាប់តែមានរឿងមិនល្អកើតឡើង។ ក្រុមកីឡាករអាល្លឺម៉ង់ បាននាំគ្នាឈប់ប្រកួត និងដើរចេញពីទីលានតែម្ដង។ ដោយដើរចេញនេះ ត្រូវបានគេដឹងថាដោយសារមានកីឡាករអាល្លឺម៉ង់ម្នាក់ ត្រូវបានគេជេរប្រមាថមើលងាយ និងរើសអើងជាតិសាសន៍។
ក្រុមអាល្លឺម៉ង់ បានសរសេរនៅលើគណនី Twitter របស់ខ្លួនថាមានកីឡាករម្នាក់ឈ្មោះថា Torunarigha ត្រូវបានគេរើសអើង និងជេរប្រមាថ។ ការណ៏នេះហើយ ទើបបានជាសមាជិកទាំងអស់សម្រេចចិត្តឈប់លេង និងដើរចេញពីទីលានតែម្ដង។ ដោយការរើងអើងនេះ គឺចេញពីកីឡាកររបស់ហុងឌូរ៉ាស់ម្នាក់ ដែលមិនបានបញ្ចេញឈ្មោះនោះទេ៕