ដូចដែលបានឃើញសឹងរាប់ភ្លេចនៅសង្វៀន ONE Championship ការប្រើកែងក្នុងក្បាច់មួយថៃអាចធ្វើឲ្យលទ្ធផលប្រែប្រួលយ៉ាងលឿន និងអាចធ្វើឲ្យគូប្រកួតមិនអាចបន្តការប្រកួតទៀតបាន ។ ពិធីករប្រចាំសង្វៀនលំដាប់ពិភពលោក Michael “The Voice” Schiavello និង Mitch “The Dragon” Chilson ក៏បានទទួលស្គាល់។
កីឡាករខ្លះប្រើកែងដូចផ្លេកបន្ទោរមើលសឹងតែមិនឃើញ ហើយការប្រើកែងទាំងនេះមានក្នុងកីឡាដូចជា គុនខ្មែរ, គុនចម្រុះ, និង មួយថៃ។ គេមិនខ្វល់ថាកីឡាប្រភេទអ្វីនោះទេ កីឡាករម្នាក់ៗបានអនុវត្តរាប់ពាន់ដងទៅលើស៊ីប និងបាវសាក់ធ្ងន់ៗ មុនពេលឡើងប្រកួតនៅលើសង្វៀន។
សូមក្រឡេកមើលការប្រកួតមួយថៃចំនួន ៥ ដែលបានប្រើកែងយ៉ាងល្អបំផុតនៅសង្វៀន ONE Championship ដោយកីឡាករល្បីៗ។
#1 ការវ៉ៃកែងក្នុងជំហរស្រប
នៅក្នុងវីដេអូនេះ គឺជាការប្រើកែងស្របរបស់ម្ចាស់ខ្សែក្រវាត់មួយថៃ ONE Bantamweight កីឡាករ Nong-O Gaiyanghadao នៅពេលរូបគេប៉ះនឹង Mehdi “Diamond Heart” Zatout។
ដើម្បីវ៉ៃកែងបែបនេះឲ្យបានល្អ Nong-O បានដាក់កដៃឲ្យនៅកណ្ដាលដើមទ្រូងមុននឹងវ៉ៃចេញម្ដងៗ។ ការធ្វើបែបនេះនាំឲ្យឆ្អឹងកែងដៃបោះទៅមុតល្អ។ ការវ៉ៃកែងបែបនេះស្រដៀងទៅនឹងការបោះកណ្ដាប់ដៃស្ដាំត្រង់ដែរ។
ជាមួយគ្នានោះ កែងរបស់ Nong-O ក៏អាចការពារកុំឲ្យគ្រោះថ្នាក់ពីការវ៉ៃកែងរបស់គូប្រជែងផងដែរ។
#2 ការវ៉ៃកែងបញ្ឈរ
ការវ៉ៃកែងបញ្ឈរត្រូវបានគេស្គាល់ថា ការវ៉ៃកែងកាត់ពីលើ ដែលជាមូលដ្ឋានផ្សេងទៀតពីការប្រកួតមួយថៃនៅលើសង្វៀន ONE។ ការវ៉ៃកែងបែបនេះភាគច្រើនកើតឡើងពេលចូលចាប់អុកជង្គង់។ ស្នៀតនេះជាការចូលចិត្តពីសំណាក់អតីតម្ចាស់ខ្សែក្រវាត់មួយថៃ ONE Flyweight កីឡាករ Jonathan “The General” Haggerty។
នៅពេល Haggerty ប៉ះម្ចាស់ខ្សែក្រវាត់ពិភពលោកពីរខ្សែ Sam-A Gaiyanghadao គេបានប្រើស្នៀតនេះយ៉ាងច្រើនក្នុងរយៈពេល ៥ ទឹកពេញ ជាពេលដែលរូបគេប្រើកែងស្ដាំយ៉ាងល្អដើម្បីប៉ងផ្ដួល Sam-A ។
ផែនការនោះត្រូវបានសម្រេច ព្រោះ Haggerty បានឈ្នះខ្សែក្រវាត់មាសបន្ទាប់ពីការប្រកួត ៥ ទឹកពេញ។
#3 ការប្រែប្រួលនៃការវៃ៉កែងកាត់
«Jutting elbow» គឺជាបម្រែបម្រួលនៃការវ៉ៃកែងកាត់ពីលើ ដែលកីឡាករជាច្រើនប្រើក្នុងចម្ងាយឆ្ងាយដោយមានការសម្រុកពីការវ៉ៃកែងទៅមក។ បច្ចេកទេសនេះមិនត្រឹមតែកីឡាករថៃ ប៉ុន្តែ តារាគុនចម្រុះហ្វីលីពីន Mark “Tyson” Fairtex Abelardo ក៏បង្ហាញបានល្អក្នុងការប្រកួតគុនចម្រុះជាមួយ Emilio “The Honey Badger” Urrutia។ អំឡុងពេលប្រកួត Abelardo បានប្រើ «Jutting elbow» ដើម្បីវាយបកពីការវ៉ៃថ្ពក់ស្ដាំរបស់គូប្រជែង។
#4 ការវ៉ៃកែងបក
កែងបកគឺជាបច្ចេកទេសកម្រិតខ្ពស់មួយដែលតម្រូវឲ្យមានការបម្លាស់ទីលឿនបំផុត។ វាជាស្នៀតដ៏ជក់ចិត្ត សម្រាប់ អ្នក គាំទ្រ ពេល Brown Pinas បានផ្ដួល Yohann Fairtex Drai ឲ្យសន្លប់ដោយសារស្នៀតនេះ។
ការវ៉ៃកែងបក ឬ ការវ៉ៃបង្វិលកែងនេះ មិនត្រូវបានប្រើជារៀងរាល់ពេលនោះឡើយ ប៉ុន្តែ ពេលវាកើតឡើងម្ដងៗ ពិតជាគ្រោះថ្នាក់ណាស់ ព្រោះវាប្រើកម្លាំងមួយទំហឹង។ វាតែងតែធ្វើឲ្យគូប្រកួតសន្លប់ ឬ បញ្ចប់ការប្រកួតលឿនដូចបានឃើញក្នុងវីដេអូខាងលើអីចឹង។
#5 ការវ៉ៃកែងចុះក្រោម
ការវ៉ៃកែងចុះក្រោមល្អសម្រាប់ការប្រកួតដែលមានគូប្រកួតខ្ពស់ជាងគូបដិបក្ខ ឬ អាចចាប់របាំងការពាររបស់គូប្រកួតជាប់ ដូចអ្វីដែលតារាលំដាប់លេខ១ទម្ងន់ flyweight , Superlek “The Kicking Machine” Kiatmoo9 ប៉ះនឹងគូប្រកួត Rui Botelho អីចឹង។
ដើម្បីប្រើការវ៉ៃកែងចុះក្រោមបានល្អ Superlek ជំទើចជើងឆ្វេងរបស់ខ្លួន ដូចត្រៀមដើម្បីទាត់អីចឹង ហើយទម្លាក់ជើងមកវិញអមដោយការវ៉ៃកែងចុះក្រោមមួយរំពេចនោះ។ ពេលនោះគេវ៉ៃកែងចុះក្រោមសំដៅបំបែកឃុំរបស់គូបដិបក្ខ។