ការប្រកួតមិត្តភាពរវាង Floyd Mayweather និង Logan Paul កាលពីថ្ងៃទី ៦ មិថុនាកន្លងទៅ បានបញ្ចប់ក្រោមលទ្ធផល គ្មានអ្នកឈ្នះ-ចាញ់ ពោលគឺ Logan អាចស៊ូជាមួយអតីតអ្នកប្រដាល់មិនដែលចាញ់បាល់ដល់ទៅ ៨ តឹក។ ក្នុងច្បាប់នៃការប្រកួតនោះ គឺគ្មានចៅក្រមដាក់ពិន្ទុតាមវគ្គនីមួយៗនោះទេ ពោលគឺវ៉ៃរហូតដល់មានអ្នកសន្លប់ដើម្បីកំណត់យកចាញ់ឈ្នះ តែសោកស្ដាយចុងក្រោយអ្នកទាំងពីរបានត្រឹមឱបគ្នាទៅមក ហើយចុះពីសង្វៀនកើបលុយទៅផ្ទះ។
លទ្ធផលនេះវាខុសពីការរំពឹងទុករបស់អ្នករាល់គ្នា មិនថាតែអ្នកគាំទ្រវិស័យប្រដាល់ និងអ្នកប្រដាល់ជើងចាស់ថ្មីមួយចំនួន សុទ្ធតែទស្សន៍ទាយថា Floyd នឹងវាយ Logan ដល់សន្លប់ ដើម្បីជាមេរៀនដែល YouTuber រូបនេះ គួរតែទទួលបាននៅថ្ងៃនោះ តែចុងក្រោយគឺផ្ទុយស្រឡះ។ សូម្បីតែ Mike Tyson ក៏និយាយដូចគ្នាថានៅខាង Floyd ហើយក្មេងដៃថ្មីម្នាក់នេះគឺគ្មានគីឡូទេ។
ក្រោយចប់ការប្រកួត ជាមួយលទ្ធផលគ្មានចាញ់-ឈ្នះ ក៏ស្រាប់តែ Logan បានបោះសម្ដីយ៉ាងឡូយ ហើយផ្ញើចំៗទៅកាន់អតីតអ្នកប្រដាល់កណ្ដាប់ដៃដែក Mike Tyson ថា Tyson បានស្ថិតក្នុងបញ្ជីខ្មៅដែលខ្លួនត្រូវវ៉ៃនៅពេលខាងមុខ។
បុរសវ័យ ២៦ ឆ្នាំនិយាយនៅសន្និសីទសារព័ត៌មានបែបនេះថា៖ “ខ្ញុំកត់ឈ្មោះអ្នកគ្រប់គ្នាដែលថា ខ្ញុំនឹងចាញ់ក្នុងការប្រកួតនេះ អ្នកទាំងនោះសុទ្ធតែគ្មានបានការ ពួកគេជាមនុស្សដែលខ្ញុំចង់ជួបនៅប្រកួតបន្ទាប់ ហើយចំពោះ Mike Tyson ខ្ញុំស្រលាញ់គាត់ តែគាត់ក៏ស្ថិតក្នុងបញ្ជីសារនេះដែរ”។
ជាការឆ្លើយតបមកវិញ ពីអតីតម្ចាស់ជើងឯកខ្សែក្រវាត់ទម្ងន់ធ្ងន់ WBA/WBC ជំនាន់ឆ្នាំ ៩៦ ពុំបានឆ្លើយថា “យល់ព្រម” នឹងការឡើងសង្វៀនជាមួយ Logan នោះទេ ផ្ទុយទៅវិញលោកបានណែនាំឲ្យ Logan ទៅប៉ះគ្នាជាមួយដៃឆៅពិតប្រាកដគឺអ្នកប្រដាល់ស៊ុយអែត Badou Jack។
Tyson និយាយទៅអតីតអ្នកប្រដាល់ Zab Judah លើ Instagram បែបនេះថា៖ “ខ្ញុំកំពុងព្យាយាមអូសឲ្យ Logan Paul ទៅវាយជាមួយ Badou Jack អ៊ីចឹងយើងចាំមើលថាគេបានសម្តីយ៉ាងម៉េចទៀត”។
Judah ក៏ឆ្លើយមកវិញ៖ “ត្រូវហើយហ្នឹងទើបជាការប្រកួតពិត បើវ៉ៃជាមួយ Badou Jack នោះ Logan Paul នឹងបានភ្លក់រសជាតិប្រកួតខ្នាតធំពិតប្រាកដ ដោយ Badou គេនឹងវ៉ៃពិតៗ គឺឡើងសង្វៀនដើម្បីវ៉ៃគូប្រជែង”។
គួរបញ្ជាក់ថា Badou Jack គឺជាអ្នកប្រដាល់ជនជាតិស៊ុយអែត អាយុ ៣៧ ឆ្នាំ ដោយឆ្លងកាត់ ៣០ ប្រកួត ធ្លាប់យកឈ្នះ ២៤ លើក ស្មើ ៣ លើក ចាញ់ ៣ លើក និងធ្លាប់ផ្តួលគូប្រកួតឲ្យសន្លប់ ១៤ លើក។ គេធ្លាប់ជាអតីតម្ចាស់ខ្សែក្រវាត់ ២ ទម្ងន់ ដោយបានរក្សាខ្សែក្រវាត់ WBC ប្រភេទទម្ងន់ Super-middleweight ចន្លោះឆ្នាំ ២០១៤ ដល់ ២០១៧ ហើយ WBA ប្រភេទទម្ងន់ Light-heavyweight នៅឆ្នាំ ២០១៧។ គីឡូធ្ងន់ប៉ុណ្ណេះ អ៊ីចឹងចាំមើលបុរសពូកែសម្តី Logan Paul ឆ្លើយតបមក Tyson វិញបែបណាទៀត?
ចំពោះ Mike Tyson បច្ចុប្បន្នលោកក៏កំពុងសស្រាក់សស្រាំក្នុងការហ្វឹកហាត់ដែរ ដោយលេចលឺថាត្រៀមឡើងសង្វៀននៅខែកញ្ញាខាងមុខ ពោលគឺក្រោយពេលជិត ១ ឆ្នាំនៃការប៉ះគ្នាសារជាថ្មីទល់ Roy Jones Jr ដែលកាលនោះគឺបញ្ចប់ត្រឹមលទ្ធផលស្មើ។
តាមការបញ្ជាក់ពីគ្រូបង្វឹករបស់ Tyson លោក Rafael Cordeiro និយាយប្រាប់ MMA Fighting៖ “យើងនៅតែបន្តហ្វឹកហាត់ ដោយគាត់ជាអត្តពលិក ដែលទាមទារការហ្វឹកហាត់ជាប្រចាំ និយាយទៅយើងនឹងមានការប្រកួតមួយនៅខែកញ្ញា តែខ្ញុំមិនទាន់ដឹងថាប៉ះនរណាទេ ព្រោះក្រុមហ៊ុនកំពុងចាត់ចែង”។
បញ្ជាក់ថា កាលខ្លាចាស់វ័យលើស ៥០ ឆ្នាំជួបគ្នាឆ្នាំទៅ គឺលក់សំបុត្រ PPV បាន ១,៦ លានសន្លឹក សរុបជាសាច់ប្រាក់បានច្រើនជាង ៥០ លានដុល្លារ។ សារនេះដ្បិតមិនច្បាស់ថាគូប្រកួតរបស់ Tyson ជានរណា តែគេជឿថា លោកនឹងមិនទៅវាយជាមួយដៃថ្មី Logan Paul អ្វីនោះទេ ផ្ទុយទៅវិញមានតែអាចប៉ះគូប្រជែងចាស់ Evander Holyfield ឬអាចជា Lennox Lewis៕
ប្រភព៖ SportBible