Taiki “Silent Sniper” Naito គ្មានអ្វីផ្សេងក្រៅពីការបង្ហាញសមត្ថភាពដ៏អស្ចារ្យចាប់តាំងពីចូលប្រឡូកសង្វៀន ONE Super Series កាលពីឆ្នាំ២០១៩។
ប៉ុន្តែដើម្បីបន្តបោះជំហានកាន់តែខ្ពស់ តារាប្រដាល់ជប៉ុនរូបនេះនឹងត្រូវជួបជើងខ្លាំងឃីកបុកសីងចំណាត់ថ្នាក់លេខ៤ទម្ងន់ flyweight កីឡាករ “Metal Storm” Wang Wenfeng នៅព្រឹត្តិការណ៍ ONE: FULL BLAST II នាថ្ងៃសុក្រ ទី១១ ខែមិថុនានេះ។
មុនពេលបានឃើញការបង្ហាញសមត្ថភាពរបស់គេនៅលើសង្វៀនមកដល់ យើងក្រឡេកមើលជ័យជម្នះ៣ប្រកួតរបស់គេនេះដែលចាត់ទុកលំដាប់កំពូលក្នុងចំណោមជ័យជម្នះរបស់ខ្លួន។
លំដាប់ទី១៖ វ៉ៃលើកដំបូងផ្តួលដៃគូសន្លប់ទឹក៣
កីឡាករជប៉ុនរហស្សនាម“Silent Sniper”បានបង្កការចាប់អារម្មណ៍យ៉ាងខ្លាំងសម្រាប់ការប្រកួតរបស់ខ្លួនលើកដំបូងដោយបានផ្តួល Alexi “Phet” Serepisos ក្នុងទឹកទី៣នៅព្រឹត្តិការណ៍ ONE: DAWN OF VALOR ខែតុលា ឆ្នាំ២០១៩។
កីឡាករជប៉ុនរូបនេះបានបង្ហាញសមត្ថភាពគួរឲ្យកត់សំគាល់នៅពេលរូបគេមានជំនាញមួយកំភ្លេតែម្តង។ រូបគេមានចលនាផ្លាស់ទី និងគេចលឿនណាស់ដែលធ្វើឲ្យដៃគូវ៉ៃរូបគេមិនងាយត្រូវ។ ជាពិសេសអាវុធរបស់គឺល្អទាំងព្រមដោយកណ្តាប់ដៃលឿន ទាត់ធ្ងន់ និងជង្គង់ក៏ល្អ។
Serepisos ធ្វើអ្វីលើរូបគេមិនកើតទេ បើទោះបីជាខំព្យាយាមដេញវ៉ៃ និងដាក់សម្ពាធក៏ដោយ ពីព្រោះចលនាក្បាលរបស់ Naito ពិតជាគេចលឿនណាស់។
នៅក្នុងទឹកទី៣ “Silent Sniper”បានចេញកណ្តាប់ដៃច្បាស់ៗដែលធ្វើឲ្យ “Phet”ដួលត្រូវបានអាជ្ញាកណ្តាលរាប់៨លើកទី១។ បន្ទាប់មក Naito វ៉ៃសន្ធាប់ដោយកណ្តាប់ដៃឆ្វេងស្តាំផ្ទួន ហើយ Phet បែកច្រមុះឈាមពេញមុខ។ មើលទៅស្ថានភាពយ៉ាប់ខ្លាំង និងតដៃលែងរួច អាជ្ញាកណ្តាលបញ្ឈប់ការប្រកួតតែម្តងក្នុងពេលដែលទឹកទី៣នៅសល់តែ១៥វិនាទីប៉ុណ្ណោះនឹងចប់។
លំដាប់ទី២៖ ឈ្នះពិន្ទុដាច់ Botelho
រយៈពេលត្រឹមតែពីរខែក្រោយប៉ុណ្ណោះ Naito បានឱកាសឡើងសង្វៀនទៀតដោយត្រូវជួបនឹងកីឡាករ Rui Botelho នៅព្រឹត្តិការណ៍ ONE: MARK OF GREATNESS និងទទួលបានជ័យជម្នះទៀត។
កីឡាករជប៉ុនបានចេញជំនាញ និងអាវុធយ៉ាងល្អឥតខ្ចោះដើម្បីគ្រប់គ្រងការប្រកួតលើដៃគូ។ តាមរយៈក្បាច់វ៉ៃ អាវុធចេញបានឆ្ងាយពិតជាមានប្រៀបណាស់ធ្វើឲ្យ Naito រក្សាភាពខ្លាំងរបស់ខ្លួនយ៉ាងល្អឥតខ្ចោះ។ អាវុធរបស់គេវ៉ៃចេញទៅលើដងខ្លួន និងក្បាលមើលទៅពិតជាមានប្រសិទ្ធភាព។
បើទោះជា Botelho អាចទ្រាំទ្ររហូតចប់៣ទឹកពេញ ប៉ុន្តែរូបគេទទួលស្គាល់ថាចាញ់ប្រៀបឆ្ងាយណាស់។ ដូច្នេះហើយបានជាចៅក្រមកាត់សេចក្តីកីឡាករជប៉ុនរូបនេះទទួលបានជ័យជម្នះដោយពិន្ទុជាឯកច្ឆន្ទ។
លំដាប់ទី៣៖ កណ្តាប់ដៃពិឃាតរាប់ Michael Down ពីរដង
ការប្រកួតកាលពីខែកុម្ភៈ ឆ្នាំ២០២០ Naito បានជួបដៃគូវ័យក្មេង កម្ពស់ខ្ពស់ និងវ៉ៃសន្ធាប់ខ្លាំង “The Baby Face Killer” Savvas Michael Petchyindee Academy នៅព្រឹត្តិការណ៍ ONE: WARRIOR’S CODE។
អ្នកគាំទ្រពិតជាចាប់អារម្មណ៍ខ្លាំងណាស់សម្រាប់ការប្រកួតនេះ ហើយ Michael បានដាក់សម្ពាធខ្លាំងតាំងពីទឹកទី១ដល់ទឹកទី២។ នៅទឹកទី១ Michael បានដាក់គំនាបយ៉ាងខ្លាំងតាមរយៈចូលវ៉ៃ និងចេញអាវុធចម្រុះទាំងកណ្តាប់ដៃ ទាត់ ធាក់ កែង និងឡើងជង្គង់ដែលជំរុញឲ្យ Naito ព្យាយាមថយក្រោយ ការពារ គេចចេញ និងវ៉ៃសងតែប៉ុណ្ណោះ។ ទឹកដំបូងនេះ Michael មើលទៅមានប្រៀបលើកីឡាករជប៉ុន។
ទោះជាយ៉ាងណា នៅទឹកទី២ កីឡាករជប៉ុនរូបនេះបានបង្កការភ្ញាក់ផ្អើលនៅពេលដៃគូរហស្សនាម“The Baby Face Killer”បានព្យាយាមដាក់សម្ពាធ និងខ្វះការការពាដែលត្រូវកណ្តាប់ដៃស្តាំពេញរបស់ Naito បណ្តាលឲ្យដួលត្រូវបានអាជ្ញាកណ្តាលរាប់៨ម្តង។ ក្រោយពេលរាប់ Michael ហាក់មានការប្រុងប្រយ័ត្នខ្ពស់ ប៉ុន្តែនៅតែបន្តវ៉ៃសម្រុក។ យ៉ាងណា តារាប្រដាល់ជប៉ុនហាក់មានទំនុកចិត្តកាន់តែខ្លាំងឡើយ។ រូបគេបានប្រើបច្ចេកទេសបំលាស់ទីលឿន គេចរហ័ស និងចេញកណ្តាប់ដៃលឿនៗ។
នៅទឹកទី៣ កីឡាករដែលហាត់នៅក្លឹបថៃ Petchyindee Academy ដឹងខ្លួនចាញ់ប្រៀប ដូច្នេះរូបគេត្រូវតែប្រឹងសម្រុកដើម្បីអាចយកប្រៀប។ ផ្ទុយទៅវិញ បែរជាខ្វះចន្លោះក្នុងការការពារដែលត្រូវបានកីឡាករជប៉ុនម៉ាត់ចំមុខពេញបណ្តាលឲ្យដួលត្រូវបានអាជ្ញាកណ្តាលរាប់៨ជាលើកទី២។ ចប់ការប្រកួត Naito ទទួលបានជ័យជម្នះ៕