ព្រឹត្តិការណ៍ Euro 2020 ដែលលើកពេលមកធ្វើនៅឆ្នាំ ២០២១ នឹងឈានចូលមកដល់នៅសប្ដាហ៍ក្រោយ ដោយក្រុមទាំងអស់បានដឹងរួចរាល់ហើយពីក្រុមគូប្រជែងដែលពួកគេត្រូវតតាំងក្នុងគោលដៅឆ្ពោះទៅកាន់វគ្គបន្ទាប់ ១៦ ក្រុមចុងក្រោយ។
ក្នុងចំណោមពូលទាំង ៦ គឺមានពូល F ដែលជាពូលមរណៈ ព្រោះលាយឡំក្រុមខ្លាំងដល់ទៅ ៣ កៀបក្រុមកម្រិតមធ្យម ១។ ព័រទុយហ្គាល់, បារាំង, អាល្លឺម៉ង់ និងហុងគ្រី នឹងត្រូវប៉ះគ្នាទៅមក ហើយចម្រាញ់យកតែ ២ ក្រុម ឡើងទៅវគ្គបន្ទាប់ ខណៈក្រុមទី ៣ ត្រូវធ្លាក់ទៅជម្រុះមួយតង់ផ្សេងទៀត។
ជឿថាក្រុមបារាំងនិងព័រទុយហ្គាល់ គឺជាក្រុមដែលអ្នកគាំទ្រចាប់អារម្មណ៍ខ្លាំងបំផុត ហើយបើស៊ីជម្រៅទៅដល់កីឡាករសំខាន់ៗ គឺមានដូចជា Cristiano Ronaldo, Kylian Mbappe និង Karim Benzema ជាដើម។ ពួកគេសុទ្ធតែមានឱកាសក្នុងការបំបែកកំណត់ត្រាធំៗនៅ Euro ឆ្នាំនេះ តែយើងសូមច្បិចលើកមកបង្ហាញពាក់ព័ន្ធនឹង Ronaldo ដែលលោកជាកីឡាករចំណាស់ជាងគេ ហើយក៏អាចជាលេង Euro លើកចុងក្រោយនៅឆ្នាំនេះដែរ។
សម្រាប់តារាឆ្នើមព័រទុយហ្គាល់ គឺមានកំណត់ត្រាធំ ៥ កំពុងរង់ចាំ ដែលខ្លះអាចថាងាយស្រួលក្នុងការបំបែក ហើយខ្លះពិបាកនឹងកើតឡើងបន្តិច នៅការប្រកួតរយៈពេលត្រឹមតែ ១ ខែខាងមុខ៖
៥) បង្ហាញខ្លួននៅ Euro ច្រើនសម័យកាលបំផុត
Cristiano Ronaldo លេចវត្តមានជាលើកដំបូងនៅ Euro ឆ្នាំ ២០០៤ ហើយជាបន្តបន្ទាប់រយៈពេល ៤ ឆ្នាំម្តង លោកបានបង្ហាញខ្លួនជាប់លាប់មកទល់ឆ្នាំ ២០២១ នេះ។ គិតទៅគឺឆ្លងកាត់ ៤ សម័យកាលហើយសម្រាប់ Ronaldo តែកន្លងមកមានកីឡាករ ១៧ រូបក៏ធ្លាប់ឈានមកដល់តួលេខនេះដូចគ្នា។
យ៉ាងណាសម្រាប់ Euro 2020 គឺជាសម័យកាលទី ៥ សម្រាប់ CR7 ដែលនឹងនាំឲ្យលោកក្លាយជាកីឡាករទី ១ បង្ហាញខ្លួននៅ Euro ច្រើនសម័យកាលបំផុតក្នុងប្រវត្តិសាស្ត្រ។
៤) រកបានគ្រាប់បាល់ច្រើនបំផុតនៅ Euro
Ronaldo រកបាន ៩ គ្រាប់នៅ Euro ដែលតួលេខនេះស្មើនឹងកំណត់ត្រារបស់អតីតជើងចាស់លោក Michael Platini។ បែបនេះមានន័យថា Ronaldo ត្រូវការតែ ១ គ្រាប់ទៀតប៉ុណ្ណោះ ដើម្បីក្លាយជាកីឡាកររកបានគ្រាប់បាល់ច្រើនបំផុតនៅ Euro តែ ១ គ្រាប់សារនេះមិនជាងាយពេកនោះទេ ព្រោះក្រុមដែលព័រទុយហ្គាល់ត្រូវប៉ះសុទ្ធតែគីឡូធ្ងន់ ជាពិសេសគឺអាល្លឺម៉ង់និងបារាំងផ្ទាល់តែម្តង។
៣) បង្ហាញខ្លួនច្រើនបំផុតនៅ Euro រាប់ទាំងប្រកួតវគ្គជម្រុះបឋម
រាប់ទាំងការប្រកួតវគ្គជម្រុះបឋម Euro Qualifying និងប្រកួតផ្លូវការ គឺ Ronaldo បង្ហាញខ្លួនសរុប ៥៦ ប្រកួត ខណៈកំណត់ត្រាកីឡាករបង្ហាញខ្លួនច្រើនបំផុតគឺ Gianluigi Buffon ដែលមាន ៥៨ ប្រកួតឲ្យជម្រើសជាតិអ៊ីតាលី ប៉ុន្តែលោកបានចូលនិវត្តតាំងពីឆ្នាំ ២០១៧។
បែបនេះមានន័យថា កីឡាករវ័យ ៣៦ ឆ្នាំ ត្រូវការ ការឈរជើងលើទីលានតែ ៣ ប្រកួតទៀតប៉ុណ្ណោះ នោះនឹងអាចបំបែកកំណត់ត្រារបស់ Buffon បានហើយ។ បញ្ជាក់ថា ៥៦ ប្រកួតកន្លងមក Ronaldo ឈ្នះ ៣៦ ស្មើ ១២ និងចាញ់ ៨ លើក។
២) កីឡាករវ័យចំណាស់បំផុតដែលអាចរកបានគ្រាប់បាល់
Ronaldo នឹងមានឱកាសក្លាយជាកីឡាករវ័យចំណាស់បំផុតដែលអាចរកបានគ្រាប់បាល់នៅវគ្គផ្ដាច់ព្រ័ត្រ។ កាលពី Euro 2016 ព័រទុយហ្គាល់បានឡើងដល់វគ្គផ្ដាច់ព្រ័ត្រ និងក្លាយជាក្រុមឈ្នះជើងឯក តែកាលនោះ CR7 មិនអាចរកបានគ្រាប់បាល់ឡើយ។
បច្ចុប្បន្នកំណត់ត្រានេះ រក្សាដោយឈ្មោះជើងចាស់លោក Bernd Holzenbein តាំងពីឆ្នាំ ១៩៧៦ ដោយលោករកបានគ្រាប់បាល់ឲ្យអាល្លឺម៉ង់ខាងលិច នៅអាយុ ៣០ ឆ្នាំ និង ១០៣ ថ្ងៃ។ សម្រាប់ Ronaldo បើអាចធ្វើបានសារនេះ នោះលោកនឹងបង្កើតកំណត់ត្រាថ្មីនៅអាយុ ៣៦ ឆ្នាំ និង ១៥៦ ថ្ងៃ។
១) កីឡាកររកបានគ្រាប់បាល់ច្រើនបំផុតនៅជម្រើសជាតិ
កំណត់ត្រានេះយើងទន្ទឹងរង់ចាំអុតមើលតាំងពីចុងឆ្នាំ ២០២០ ឥឡូវហៀរចូលមកដល់ពាក់កណ្ដាលឆ្នាំ ២០២១ ក៏វាកាន់តែកៀកបន្ថែមទៀត។ Cristiano Ronaldo មាន ១០៣ គ្រាប់ ខណៈ Ali Daei មាន ១០៩ គ្រាប់ ពោលគឺ CR7 ត្រូវការ ៧ គ្រាប់ ដើម្បីបំបែកបាន។
បើព័រទុយហ្គាល់អាចឡើងដល់វគ្គផ្ដាច់ព្រ័ត្រ នោះក្រុមនឹងឆ្លងកាត់យ៉ាងហោចណាស់ ៦ ប្រកួត ដែលពេលវេលាទាំងអស់លើទីលាន សុទ្ធតែជាឱកាសសម្រាប់ Ronaldo ក្នុងការបំបែកកំណត់ត្រាខ្នាតយក្សមួយនេះ៕
ប្រភព៖ Sportskeeda