ប្រទេសអាហ្សង់ទីន មិនអាចធ្វើជាម្ចាស់ផ្ទះព្រឹត្តិការណ៍ Copa America បានទេ ដោយសារតែក្នុងប្រទេសនេះកំពុងផ្ទុះមេរោគកូវីដ១៩ខ្លាំង។
សហព័ន្ធបាល់ទាត់អាមេរិកខាងត្បូង CONMEBOL បានប្រកាសកាលពីយប់មិញនេះថា ប្រទេសអាហ្សង់ទីន នឹងមិនអាចធ្វើជាម្ចាស់ផ្ទះរៀបចំការប្រកួត Copa America បានឡើយ ដោយសារតែបញ្ហាកូវីដ១៩ កំពុងផ្ទុះខ្លាំង។ ខណៈដែលការប្រកួតវិញនៅសល់តែ១៣ថ្ងៃទៀតប៉ុណ្ណោះនឹងចាប់ផ្ដើមទៅហើយ តែបែរជាម្ចាស់ផ្ទះមិនអាចរៀបចំបានទៅវិញ។
ការប្រកួតធំនៅអាមេរិកខាងត្បូង ដែលមាន១០ប្រទេសចូលរួមនេះ នឹងចាប់ផ្ដើមដំណើរការប្រកួតនៅថ្ងៃទី១៣ខែក្រោយ រហូតដល់ថ្ងៃទី១០ខែកក្កដា ដោយដំបូងឡើយមាន២ប្រទេសធ្វើជាម្ចាស់ផ្ទះ គឺ កូឡុំប៊ី និងអាហ្សង់ទីន។ ប្រទេសកូឡុំប៊ី បានផ្អាកធ្វើជាម្ចាស់ផ្ទះ តាំងពីប៉ុន្មានខែមុនម្ល៉េះ ដោយនៅតែអាហ្សង់ទីនប៉ុណ្ណោះ។ តែពេលនេះ ក៏ស្រាប់តែប្រទេសអាហ្សង់ទីននេះទៀត ក៏មិនអាចធ្វើជាម្ចាស់ផ្ទះបានដែរ ព្រោះកំពុងរីករាលដាល់កូវីដ១៩ខ្លាំង។ ពេលនេះ សហព័ន្ធបាល់ទាត់អាមេរិកខាងត្បូង កំពុងស្វែងរកប្រទេសដើម្បីធ្វើជាម្ចាស់ផ្ទះបន្ដ៕ប្រភព Reuters
