Riyad Mahrez កន្លងមកធ្លាប់អះអាងត្រង់ៗថា ខ្លួនប៊ិះតែនឹងទៅចូលរួមជាមួយក្លឹប Marseille កាលពីរដូវកាល ២០១៤/១៥ ហើយក្នុងចិត្តក៏នៅតែគិតថាចង់ទៅលេងឲ្យក្លឹបបារាំងមួយនោះនៅពេលខាងមុខដែរ តែយ៉ាងណាមកទល់ពេលចុងក្រោយនេះ កីឡាករអាល់ហ្សេរីបែរជាបញ្ជាក់ច្បាស់ៗថាក្លឹបចុងក្រោយដែលខ្លួនចង់រួមរស់គឺនៅ Machester City នេះឯង។
Mahrez កំពុងជោគជ័យខ្លាំងជាមួយមេឃខៀវ ដែលឈ្នះទាំងពាន Premier League និងត្រៀមអាចលើកពាន Champions League នៅរដូវកាល ២០២០/២១។ គេបង្ហាញខ្លួន ៤៥ ប្រកួត រកបាន ១៤ គ្រាប់និង Assist ៧ លើក។
សួរនាំពាក់ព័ន្ធនឹងអនាគតទៅថ្ងៃមុខ Mahrez បានប្រាប់ RMC ដូច្នោះថា៖ “អនាគតរបស់ខ្ញុំ? ខ្ញុំពេលនេះពិតជាមានអារម្មណ៍ល្អជាមួយ Man City ហើយក៏គ្មានបំណងសម្លឹងមើលទៅក្លឹបផ្សេងទៀតដែរ ពោលគឺខ្ញុំមិនទាន់ដឹងច្បាស់អំពីស្ថានភាពរបស់ខ្ញុំថាបែបណាឡើយ តែដឹងត្រឹមពេលនេះខ្ញុំរីករាយនៅ City”។
លោកឆ្លើយតបពាក់ព័ន្ធនឹងសំណួរដែលគេសួរថា ក្លឹប Marseille អាចជាក្លឹបចុងក្រោយរបស់លោកឬអត់ថា៖ “អត់ទេ វាមិនមែនជាអ្វីដែលខ្ញុំគិតនោះទេ ដោយខ្ញុំចង់បញ្ចប់អាជីពរបស់ខ្ញុំនៅអង់គ្លេស ជាមួយ Manchester City”៕
ប្រភព៖ Goal