ក្លឹបម្ចាស់ដី Stamford Bridge ដែលចាត់ការដោយលោក Thomas Tuchel ត្រូវបានគេរាយការណ៍ថា កំពុងចាប់អារម្មណ៍លើកីឡាករជំនាញខាងបញ្ចប់ទី Mohamed Salah នៅឯក្លឹប Liverpool ដោយចង់ចរចានាំយកគេនៅទីផ្សារដោះដូរខាងមុខ។
បុរសវ័យ ២៨ ឆ្នាំធ្លាប់រួមរស់នៅ Chelsea ចន្លោះឆ្នាំ ២០១៤ ដល់ ២០១៦ តែពេលនោះគេធ្វើមិនសូវបានល្អទេ ហើយរកបានតែ ២ គ្រាប់គត់នៅការបង្ហាញខ្លួនសរុប ១៩ ប្រកួត។ យ៉ាងណាក្រោយមកចូលរួមនៅ Liverpool ពេលផ្ទេរពី Roma នៅឆ្នាំ ២០១៧ បុរសសញ្ជាតិអេហ្សីបរកបានដល់ទៅ ១២៣ គ្រាប់និង Assist ៤៥ លើកនៅការបង្ហាញខ្លួន ១៩៨ ប្រកួត។
ដោយមើលឃើញពីគុណភាពនេះហើយ លោក Tuchel ក៏ចាប់អារម្មណ៍ដាក់ឈ្មោះគេទៅក្នុងបេក្ខភាពធំៗដែលក្លឹបចង់បាន ពោលគឺជាមួយនឹងបេក្ខភាពធំ ២ ផ្សេងទៀតមាន Erling Haaland របស់ Dortmund និង Romelu Lukaku របស់ Inter Milan។ ចំពោះតម្លៃផ្ទេររបស់ Salah បើគេព្រមចាកចេញ អាចជាថ្លៃខ្ទង់ ១១០ លានអឺរ៉ូ៕
ប្រភព៖ Sportsmole