Romelu Lukaku បានឈ្នះពានរង្វាន់លីគកំពូលអ៊ីតាលី Serie A រដូវកាលនេះ ហើយក៏បានចេញសារជាច្រើនទៅកាន់ Zlatan Ibrahimovic ដែលបានផ្ទុះពាក្យសម្តីរវាងគ្នាកាលពីពេលកន្លងមក។
ទើបតែបោះពាក្យថ្ងៃមុន ឥឡូវកីឡាករបែលហ្សិកចេញមកនិយាយសារជាថ្មីហើយ ថាលោកព្រះ Zlatan ចង់តែឈ្នះដើម្បីខ្លួនឯង មិនមែនឈ្នះដើម្បីក្រុមទាំងមូលនោះទេ។
ខ្សែប្រយុទ្ធកណ្តាលរបស់ក្លឹប Inter Milan បាននិយាយប្រាប់សារព័ត៌មាន Cds បែបនេះថា៖ “ខ្ញុំស្រមៃលេងឲ្យ Inter តាំងពីនៅក្មេង ហេតុហ្នឹងហើយទើបខ្ញុំចាប់រៀនសូត្រភាសាអ៊ីតាលី ដោយខ្ញុំចង់ធ្វើបានដូចជា [Adriano] ដោយខ្ញុំស្រលាញ់នូវការលេងរបស់គាត់និងអ្វីដែលគាត់សម្រេចបាន”។
គេបន្តបោះពាក្យឌឺដងដល់ Zlatan និងលើកសរសើរ Ronaldo ដែលសុទ្ធជាអតីតមិត្តរួមក្រុមរបស់ខ្លួននៅ Man Utd បែបនេះថា៖ “[Ibrahimovic] គេជាកីឡាករល្អ គេឈ្នះពានរង្វាន់ជាច្រើន និងរកបានច្រើនជាង ៥០០ គ្រាប់ហើយកាលនៅ Man Utd យើងមានទំនាក់ទំនងល្អជាមួយគ្នា តែពេលនេះខ្ញុំមកទីនេះគឺចង់ឈ្នះពានដើម្បី Inter ហើយ Cristiano ក៏ចង់ឈ្នះដើម្បី Juventus ខណៈដែល Ibra គាត់ចង់ឈ្នះដើម្បីខ្លួនឯងប៉ុណ្ណោះ”៕
ប្រភព៖ AF