ត្រលប់ទៅរដូវកាល ២០០៧/០៨ ក្លឹបមេឃខៀវ Manchester City បានស្ថិតក្រោមការគ្រប់គ្រងដោយអ្នកជំនួញថៃល្បីឈ្មោះគឺលោក ថាក់ស៊ីន ស៊ីណាវ៉ាត្រា ហើយដល់ថ្ងៃទី ១ កញ្ញា ឆ្នាំ ២០០៨ បុរសជនជាតិថៃក៏ប្រកាសលក់ក្លឹប បន្តទៅដៃអ្នកថ្មីដែលជាសេដ្ឋីអារ៉ាប់គឺលោក Sheikh Mansour ដែលជាសមាជិកនៃខ្សែរាជវង្ស Abu Dhabi និងជាអ្នកគ្រប់គ្រងក្រុមហ៊ុន Abu Dhabi Group។
ដើមឡើយមុនឆ្នាំ ២០១០ Man City ប្រៀបដូចជាក្រុមកម្រិតមធ្យមមួយនៅលីគអង់គ្លេស ដែលស្គាល់ត្រឹមរសជាតិឈ្នះពានតូចតាចក្នុងស្រុក ហើយនៅពានអឺរ៉ុបមិនធ្លាប់ទទួលបានសូម្បីតែកៅអីឡើងមកលេងនៅវគ្គចែកពូល។
យ៉ាងណាក្រោយការចូលមកគ្រប់គ្រងដោយសេដ្ឋីអារ៉ាប់ ក្រុមមានមូលដ្ឋានក្នុងទីក្រុង Manchesteer ក៏បានប្រែមុខមាត់ថ្មី និងទទួលបានភាពល្អប្រសើរពីមួយឆ្នាំទៅមួយឆ្នាំ ហើយឈានមកដល់ចំណុចកំពូលក្លាយជាក្លឹប Man City ដូចដែលគ្រប់គ្នាកំពុងខ្លាចរអានៅពេលនេះ។
ចុះមុននឹង City អាចឡើងមកដល់វគ្គផ្តាច់ព្រ័ត្រ UCL ជាលើកដំបូងនៅឆ្នាំ ២០២១ តើកាលពីអតីតកាលពួកគេធ្លាប់ឆ្លងកាត់បរាជ័យធ្ងន់ធ្ងរកម្រិតណាខ្លះ ហើយនិយាយពីការចំណាយវិញ City ចាយអស់ប៉ុន្មានពាន់លានដុល្លារហើយ? ខាងក្រោម CTS Sports បង្ហាញចំណុចធំ ៣ ដែលអ្នកគួរតែដឹង៖
៣) ទំហំប្រាក់ដែលបានចំណាយ
បើប្រៀបធៀបកាលពីយប់មិញ ទាំង PSG និង Man City សុទ្ធតែស្ថិតក្រោមការគ្រប់គ្រងដោយក្រុមហ៊ុនធំនៅអារ៉ាប់ ហើយចាប់ផ្តើមទទួលបានទុនវិនិយោគធំ ក្នុងរយៈពេលជាង ១០ ឆ្នាំចុងក្រោយ។
សម្រាប់ PSG ស្ថិតក្រោមការគ្រប់គ្រងដោយក្រុមហ៊ុន Qatar Sports Investments ពួកគេចាយអស់ ១,៥១ ពាន់លានដុល្លារ តែមកមើល City ឯណេះវិញរាប់តាំងពីឆ្នាំ ២០០៨ រៀងមកគឺចាយអស់ដល់ទៅ ២,៤២ ពាន់លានដុល្លារឯណោះ។ តួលេខជាក់ស្តែងពួកគេបានចំណាយលើការនាំយកកីឡាករថ្មីចូលក្រុម ដោយចាយអស់ច្រើនជាង ១០០ លានដុល្លារ/រដូវកាល ចំនួន ១០ រដូវកាលផ្សេងៗពីគ្នា។ នេះបើតាមទិន្នន័យពី TransferMarkt បានចុះផ្សាយ។
២) បណ្តុំកីឡាករតម្លៃកប់ពពករបស់ City
ចាប់តាំងពីរដូវកាល ២០១៥/១៦ រៀងមក ក្លឹប Man City ក៏ផ្តើមចេះចាយលុយច្រើនជាង ៥០ លានអឺរ៉ូ លើការចុះហត្ថលេខានាំយកកីឡាករថ្មី។ បើសួរថា តើកីឡាកររូបណាខ្លះដែល City ធ្លាប់ចំណាយអស់ច្រើនបំផុត?
ក្នុងនោះយើងសង្ខេបឈ្មោះអ្នកទាំង ៥ មកបង្ហាញដូចខាងក្រោម៖
ការទិញយកខ្សែការពារកណ្តាល Aymeric Laporte ពីក្លឹប Athletic នៅឆ្នាំ ២០១៨ ក្នុងតម្លៃ ៦៥ លានអឺរ៉ូ
ការទិញយកខ្សែការពារស្លាបស្តាំ Joao Cancelo ពីក្លឹប Juventus នៅឆ្នាំ ២០១៩ ក្នុងតម្លៃ ៦៥ លានអឺរ៉ូ
ការទិញយកខ្សែប្រយុទ្ធស្លាបស្តាំ Riyad Mahrez ពីក្លឹប Leicester នៅឆ្នាំ ២០១៨ ក្នុងតម្លៃ ៦៧,៨០ លានអឺរ៉ូ
ការទិញយកខ្សែការពារកណ្តាល Ruben Dias ពីក្លឹប Benfica នៅឆ្នាំ ២០២០ ក្នុងតម្លៃ ៦៨ លានអឺរ៉ូ
ការទិញយកខ្សែបម្រើប្រយុទ្ធ Kevin de Bruyne ពីក្លឹប Wolfsburg នៅឆ្នាំ ២០១៥ ក្នុងតម្លៃ ៧៦ លានអឺរ៉ូ
យ៉ាងណាក៏មានកីឡាករចំនួន ១៧ រូប ដែល City មិនចំណាយអស់សូម្បីតែមួយសេន្យលើតម្លៃផ្ទេរ ដោយពួកគេបានសម្រេចចិត្តមកចូលរួមលើលក្ខខណ្ឌផ្ទេរឥតតម្លៃខ្លួន ហើយក៏មានកីឡាករកំពូលៗនិងខ្លះបង្កើតភាពជោគជ័យគួរឲ្យកត់សម្គាល់តួយ៉ាងដូចជា Patrick Vieira, Andy Cole និង Bacary Sagna ជាដើម។
៣) ជោគជ័យនិងបរាជ័យដែល City ធ្លាប់ហែលកាត់
Man City ចាប់ផ្តើមទទួលបានជោគជ័យក្រោយការចុះហត្ថលេខាយកបាន Sergio Aguero ដែលជាម៉ាស៊ីនបញ្ចប់ទីដ៏ល្អមួយ ហើយគេជាចំណែកសំខាន់ជួយឲ្យក្រុមស្គាល់រសជាតិឈ្នះពាន Premier League នៅរដូវកាល ២០១១/១២ ក្រោយខកខានអស់រយៈពេល ៤៤ ឆ្នាំ។
បន្ទាប់ៗមកមានទាំងជ័យជម្នះនៅពាន EFL Cup, Community Shield, FA Cup និង Premier League ដែលសរុបមានចំនួន ១៥ ពាន រាប់ចាប់ពីឆ្នាំ ២០០៨ ក្រោយការមកកាន់កាប់របស់មហាសេដ្ឋីអារ៉ាប់។ ចន្លោះពេលនោះអ្នកចាត់ការដែលដឹកនាំក្លឹបឲ្យទទួលបានផ្លែផ្កាច្រើន មានដូចជាលោក Roberto Mancini, Manuel Pellegrini និងចុងក្រោយនេះគឺលោក Pep Guardiola ដែលត្រៀមនឹងជួយក្លឹបឈ្នះពាន Premier League លើកទី ៧ នៅពេលដ៏ខ្លីខាងមុខ។
និយាយពីបរាជ័យវិញ យើងសូមលើកតែនៅការប្រកួតពានអឺរ៉ុប UEFA Champions League ដោយពួកគេបានឡើងមកដល់វគ្គចែកពូលជាលើកដំបូងនៅរដូវកាល ២០១១/១២ ហើយចាប់តាំងពីពេលនោះមក មានឈ្មោះលេងនៅ UCL បណ្ដាក់គ្នាជារៀងរាល់ឆ្នាំ។ ដល់ឆ្នាំ ២០១៦ City ធ្វើឲ្យមានការសាទរខ្លាំង បន្ទាប់ពីអាចឡើងដល់វគ្គពាក់កណ្ដាលផ្ដាច់ព្រ័ត្រ តែត្រូវចាញ់ Real Madrid ហើយចន្លោះពេល ១០ ឆ្នាំមកនេះវគ្គ ៤ ក្រុមជាកម្រិតខ្ពស់បង្អស់ហើយសម្រាប់មេឃខៀវ។
ទើបតែមកដល់ឆ្នាំ ២០២១ កាលពីយប់មិញនេះទេ City បានបង្កើតកំណត់ត្រាប្រវត្តិសាស្ត្រសម្រាប់ខ្លួនឯង តាមរយៈជ័យជម្នះទៅលើ PSG ហើយកក់បានកៅអីឡើងទៅវគ្គផ្ដាច់ព្រ័ត្រជាលើកដំបូង៕
ប្រភព៖ TransferMarkt
ហាមយកអត្ថបទពី CTS Sports ទៅចុះផ្សាយបន្ត ដោយគ្មានការអនុញ្ញាត!