នៅការប្រកួតរវាង Man Utd និង Liverpool នៅឯកីឡដ្ឋាន Old Trafford កាលពីយប់មិញ ពុំអាចចាប់ផ្តើមទៅបាននោះទេ ក្រោយពីអ្នកគាំទ្រជាច្រើនបានរត់ចូលមកក្នុងកីឡដ្ឋាន ហើយលើកបដាស្រែកតវ៉ាទាមទារឲ្យត្រកូល Glazer ចុះចេញពីតំណែងជាម្ចាស់ក្លឹប។
ពាក់ព័ន្ធនឹងរឿងនេះ Gary Neville ធ្លាប់ជាអតីតកីឡាករនៅបិសាចក្រហមមួយរូប ក៏បានចេញមកនិយាយគាំទ្រដល់សកម្មភាពរបស់អ្នកគាំទ្រកាលពីយប់មិញ ហើយជឿថាវាសក្តិសមដល់ពេលដែលត្រកូល Glazer ត្រូវលក់ក្លឹបទៅឲ្យអ្នកថ្មីហើយ។
Neville និយាយ៖ “ត្រកូល Glazer បានរឹងមាំអស់រយៈពេលជាច្រើនឆ្នាំ ដោយតាំងពីឆ្នាំ ២០០៤ ពួកគេបានធ្វើឲ្យក្លឹបមួយនេះ មានកីឡដ្ឋានល្អបំផុតប្រចាំផ្ទៃប្រទេស និងក្លឹបជាល្អបំផុតនៅអឺរ៉ុប ជាមួយនឹងទីលានហ្វឹកហាត់ដ៏ល្អដាច់គេមួយ ហើយក្រុមក៏បានឡើងទៅលេងនៅវគ្គ ៨ ក្រុម ៤ ក្រុម និងផ្តាច់ព្រ័ត្រ Champions League ជាមួយជ័យជម្នះនៅលីគសឹងតែរៀងរាល់រដូវកាល”។
លោកបន្ត៖ “តែមើលមកក្លឹបពេលនេះ កីឡដ្ឋានមើលទៅស្អាតល្អហើយ តែនៅពីក្រោយនោះវាត្រូវបានបំផ្លាញ ហើយមើលទីលានហ្វឹកហាត់ក៏មិនបានជាប់ឈ្មោះសូម្បីតែ Top 5 នៅផ្ទៃប្រទេស រីឯនៅ Champions League ខកខានការលេងវគ្គពាក់កណ្តាលផ្តាច់ព្រ័ត្ររយៈពេល ១០ ឆ្នាំ និងនៅលីគក្រុម Man Utd មិនទាន់បានឈ្នះ ៨ ឆ្នាំមកហើយ”។
“វាក៏ដល់ពេលដែលត្រកូល Glazer កំពុងជួបបញ្ហាហិរញ្ញវត្ថុ ហើយអ្នកគាំទ្រក៏ដល់ពេលដែលត្រូវក្រោកឈរ ទាមទារលើរឿងនេះដែរ តាមការយល់ឃើញរបស់ខ្ញុំ ប្រសិនត្រកូល Glazer ចង់លក់ក្លឹប គឺពេលនេះហើយសក្តិសមបំផុត និងជារឿងដែលគួរឲ្យគោរពបំផុតប្រសិនពួកគេធ្វើ”៕
ប្រភព៖ BeSoccer