ការប្រកួតជើងទី ២ វគ្គពាក់កណ្តាលផ្តាច់ព្រ័ត្រ Champions League នឹងឈានចូលមកដល់ទៀតហើយនៅពាក់កណ្តាលសប្តាហ៍នេះ ដោយក្រុម PSG នឹងត្រូវតតាំងក្រុម Man City ខណៈ Chelsea ត្រូវជួប Real Madrid។
កាលពីជើងទី ១ ជំនួប Chelsea-Real Madrid បញ្ចប់ទៅក្រោមលទ្ធផល ១-១ នាំឲ្យគេកាន់តែចង់អុតមើលពីការប្រកួតជើងទី ២ ដែលសម្រាប់ Chelsea ត្រូវការត្រឹមលទ្ធផល ០-០ ក៏ឡើងបាននោះ។
យ៉ាងណាមុនដល់ការប្រកួត ខាងក្រុមអង់គ្លេសក៏បានជួបរឿងកង្វល់ចិត្តមួយពាក់ព័ន្ធនឹងភាពមិនប្រាកដប្រជារបស់កីឡាករសំខាន់ Mason Mount ដែលគេត្រូវបានប្តូរចេញកំឡុងការប្រកួតទល់ Fulham កាលពីចុងសប្តាហ៍។
នៅប្រកួតយកឈ្នះ ២-០ ទៅលើ Fulham កីឡាករអង់គ្លេសលេងដល់ក្បែរនាទី ៨០ ក៏ត្រូវបានលោក Tuchel ប្តូរចេញ ហើយបកស្រាយក្រោយចប់ការប្រកួត អ្នកចាត់ការសញ្ជាតិអាល្លឺម៉ង់និយាយថា ដោយឃើញស្ថានភាពរបស់ Mount ហាក់មិនសូវស្រួល បែបហ្នឹងទើបមិនបន្តប្រថុយដាក់គេឲ្យលេង។
លោក Tuchel និយាយ៖ “ខ្ញុំពិតជាសង្ឃឹមថា Mason នឹងមិនអីទៅចុះ ហើយសង្ឃឹមថាគេនឹងអាចជាទាន់ពេលសម្រាប់ប្រកួតទល់ Real Madrid ដោយពេលនោះខ្ញុំឃើញគេរាងមានបញ្ហាត្រង់ផ្នែកខ្នង ទើបខ្ញុំសម្រេចចិត្តដកគេចេញសិន”៕
ប្រភព៖ BeSoccer