ស្ថាប័នពិភពលោក ONE Championship នឹងបិទបញ្ចប់រដូវកាលទី១នៃព្រឹត្តិការណ៍ “ONE on TNT”ជាមួយនឹងស៊េរីទី៤ “ONE on TNT IV” ដែលនឹងផ្សាយផ្ទាល់ទៅកាន់ទឹកដីសហរដ្ឋអាមេរិកនៅម៉ោងមាសនាព្រឹកថ្ងៃព្រហស្បតិ៍ ទី២៩ ខែមេសា ខាងមុខនេះ។
បន្ថែមលើការប្រកួតដណ្តើមខ្សែក្រវាត់ពិភពលោក ONE Light Heavyweight ក្នុងតំណែងគូឯករវាងម្ចាស់ខ្សែក្រវាត់ Aung La N Sang និងអ្នកដណ្តើម Vitaly Bigdash ការប្រកួតរវាងអ្នកលេងគុនចម្រុះដ៏ល្បី៣គូរបស់ខ្លាកំណាចអាស៊ី និងការវិលមកកាន់សង្វៀនជាថ្មីរបស់ Eddie “The Underground King” Alvarez។ ទាំងអស់នេះធានាថា អ្នកគាំទ្រទូទាំងពិភពលោកនឹងទទួលបានចំណីចក្ខុយ៉់ាងពិសេសប្លែកបំផុត។
ការប្រកួតបើកឆាកក្នុងចំណោមគូឯក “ONE on TNT IV” គឺជើងខ្លាំងទម្ងន់យក្ស “Reug Reug” Oumar Kane ឡើងសង្វៀនទៀតហើយ។
កីឡាករចំបាប់សេណេហ្គាល់ដែលមិនទាន់ស្គាល់បរាជ័យបានកំពុងជោគជ័យយ៉ាងអស្ចារ្យ បន្ទាប់ពីចូលប្រឡូកក្នុងអាជីពគុនចម្រុះ។ កាលពីដើមខែនេះ រូបគេទើបតែបានផ្តួល Patrick “Big Swiss” Schmid ក្នុងទឹកទី១នៅព្រឹត្តិការណ៍ “ONE on TNT I” ដែលបានក្លាយជាជ័យជម្នះលើកទី២ក្នុងការបង្ហាញខ្លួនប្រកួតពីរលើកនៅលើសង្វៀនពិភពលោក។
ខាងមុខនេះ “Reug Reug”ត្រូវប្រឈមនឹងកីឡាករថ្មីមកពីប្រទេសប៊ុលហ្គារី Kirill Grishenko។ ដូច Kane ដែរ កីឡាករប៊ុលហ្គារីអាយុ២៩ឆ្នាំក៏មិនទាន់ស្គាល់ពាក្យថា ចាញ់ឡើយក្នុងការប្រកួតគុនចម្រុះ៣លើកដោយផ្តួលដៃគូក្នុងទឹកទី១ទាំងបីលើក ប៉ុន្តែជាការប្រកួតលើកដំបូងនៅ ONE។
ជាមួយគ្នានេះ កីឡាការិនីពូកែប្រើកណ្តាប់ Jackie Buntan ត្រូវវិលត្រឡប់មកកាន់សង្វៀនដែរក្នុងតំណែងគូពិសេស។ កីឡាការិនីអាមេរិក-ហ្វីលីពីនដែលហាត់ជាមួយម្ចាស់ជើងឯកឃីកបុកសីងពិភពលោក ONE Atomweight នាង Janet “JT” Todd នៅក្លឹប Boxing Works បានធ្វើឲ្យមានការភ្ញាក់ផ្អើលយ៉ាងខ្លាំងសម្រាប់ការប្រកួតលើកដំបូងរបស់នាងដែលបានចេញជំនាញដ៏អស្ចារ្យដើម្បីយកឈ្នះកីឡាការិនីថៃ Wondergirl Fairtex កាលពីខែកុម្ភៈ។
សម្រាប់ការវិលត្រឡប់មកកាន់សង្វៀនលើកនេះ Buntan ត្រូវពាក់ស្រោមដៃគុនចម្រុះ៤អោនតទល់ជាមួយកីឡាការិនី Ekaterina “Barbie” Vandaryeva។
ការប្រកួតចុងក្រោយ កីឡាការិនីប៊ុលហ្គារី Ekaterina ត្រូវបានជើងឯកពិភពលោក Todd ទាត់ផ្កាប់ចានឲ្យ សន្លប់ក្នុងទឹកទី២។ ឥឡូវនេះ នាងបានអភិវឌ្ឍខ្លួន និងវិលត្រឡប់មកកាន់សង្វៀនវិញជួបមិត្តរួមក្លឹបរបស់ដៃគូចាស់។
ចំណែកកីឡាការិនីអាមេរិក Colbey Northcutt បានជួបដៃគូថ្មីហើយ។ ដើមឡើយ កីឡាការិនីការ៉ាតេអាមេរិករូបនេះត្រូវផ្គូផ្គងឲ្យប្រកួតជាមួយកីឡាការិនីខ្មែរ-អាមេរិក អែម សុវណ្ណារី ប៉ុន្តែកីឡាការិនីខ្មែរ-អាមេរិកបានដកខ្លួន ដោយសាររបួសស្មាពេលហ្វឹកហាត់់។
ដូច្នេះ Northcutt ត្រូវជួបដៃគូ Courtney “No Mercy” Martinដែលវ៉ៃក្នុងប្រភេទទម្ងន់៦០.៦គីឡូក្រាម។
ខាងក្រោមជាសមាសភាពគូប្រកួតទាំងអស់។
គូឯក
(ជើងឯក) Aung La N Sang ប្រកួតជាមួយ Vitaly Bigdash (ដណ្តើមខ្សែក្រវាត់ពិភពលោកទម្ងន់ធ្ងន់ ONE Light Heavyweight)
កីឡាករ Eddie Alvarez ប្រកួតជាមួយ Marat Gafurov/Ok Rae Yoon (ការប្រកួតគុនចម្រុះ)
កីឡាករ Oumar Kane ប្រកួតជាមួយ Kirill Grishenko (ការប្រកួតគុនចម្រុះ)
គូពិសេស
កីឡាករ Eduard Folayang ប្រកួតជាមួយ Shinya Aoki (ការប្រកួតគុនចម្រុះ)
កីឡាករ Jackie Buntan ប្រកួតជាមួយ Ekaterina Vandaryeva (ការប្រកួតមួយថៃ)
កីឡាការិនី Colbey Northcutt ប្រកួតជាមួយ Courtney Martin (ការប្រកួតគុនចម្រុះ)