ម្ចាស់ខ្សែក្រវាត់ ONE Lightweight World Champion កីឡាករ Christian “The Warrior” Lee បន្តគ្រងខ្សែក្រវាត់បន្តទៀត ក្រោយជ័យជម្នះដ៏អស្ចារ្យមុននេះបន្តិច។
កូនកាត់សិង្ហបុរី-អាមេរិកប៉ះគូប្រជែង Timofey Nastyukhin នៅព្រឹត្តិការណ៍ “ONE on TNT II” នាព្រឹកថ្ងៃប្រហស្បតិ៍ទី ១៥ ខែ មេសានេះ ប៉ុន្តែ គេមិនទុកពេលវេលាឲ្យកន្លងផុតទៅទេដោយបញ្ចប់ត្រឹមទឹកទី១ ក្នុងការប្រកួតគុនចម្រុះ។
ម្ចាស់ខ្សែក្រវាត់ពិភពលោកវ័យក្មេង Christian Lee ប្រើពេលមិនខុសពីការប្រកួតលើកពីមុនៗទេដោយចំណាយពេលត្រឹមតែជាង៣នាទីប៉ុណ្ណោះដើម្បីផ្តួល Nastyukhin នៅព្រឹត្តិការណ៍ “ONE on TNT II”ដែលផ្សាយបន្តផ្ទាល់នូវម៉ោងមាសទៅកាន់សសហរដ្ឋអាមេរិក។
មុនពេលអាជ្ញាកណ្តាលបញ្ឈប់ការប្រកួត Christian Lee បានប្រើកណ្តាប់ដៃឆ្វេងវ៉ៃចំថ្គាមរបស់ Nastyukhin ឲ្យដួល រួចហើយឱបពីលើ និងប្រើកណ្តាប់ស្តាំវ៉ៃផ្ទួនៗដែលតាមចំនួន១៥ដៃទើបអាជ្ញាកណ្តាលបញ្ឈប់នៅនាទី១:១៣នាទីក្នុងទឹកទី១ ក្រោយពេល Nastyukhin គ្មានលទ្ធភាពតដៃរួច។
ភាពភ្ញាក់ផ្អើលនេះ មិនខុសពីការផ្តួលវីរបុរសគុនចម្រុះជប៉ុន Shinya Aoki ឲ្យអាជ្ញាកណ្តាលបញ្ឈប់ការប្រកួតនៅក្នុងទឹកទី២ដែលបានបង្កការភ្ញាក់ផ្អើលយ៉ាងខ្លាំង និងបន្តផ្តួល Luri Lapicus ដោយចំណាយពេលជាង២នាទីប៉ុណ្ណោះនៅក្នុងទឹកទី១។
កាលពីខែតុលា Christian Lee ក៏បានផ្តួល Saygid Guseyn Arslanaliev ក្នុងទឹកទី៣ដើម្បីឈ្នះពានរង្វាន់ និងជាខ្សែក្រវាត់ពិភពលោក ONE Lightweight Grand Prix ដែលជាខ្សែក្រវាត់ទី២របស់ខ្លួន។
បន្ទាប់ពីចប់ការប្រកួត Nastyukhin បានសម្តែងកាយវិការហាក់មិនពេញចិត្តនឹងចំណាត់ការរបស់អាជ្ញាកណ្តាលដែលបញ្ឈប់ការប្រកួត ពីព្រោះរូបគេមិនអាចតដៃរួចមែន ប៉ុន្តែមិនទាន់សន្លប់ និងកំពុងព្យាយាមរើបម្រើចេញ។
«Timofey ចូលចិត្តសម្រុកចូល និងចង់ផ្ដួលខ្ញុំ។ ដូច្នេះ យើងបានរៀបចំរួចហើយ។ ថាមពល និង ការប្រើកណ្ដាប់ដៃច្បាស់លាស់បានធ្វើឲ្យឈ្នះពេលនេះ»។ ម្ចាស់ខ្សែក្រវាត់បានប្រាប់បែបនេះ។
ក្រោយជ័យជម្នះ Lee កើនកំណត់ត្រាឈ្នះ ១៥ ដង និងចាញ់ ៣ ដង ហើយនេះជាការឡើងការពារខ្សែក្រវាត់ ONE Lightweight World Championship លើកទី២។ ត្រឹមវ័យ ២២ ឆ្នាំ គេបន្តជ័យជម្នះច្រើនបំផុត (១៥ដង) និងបញ្ចប់គូប្រកួតច្រើនបំផុត (១៤ដង) នៅសង្វៀន ONE Championship ជាប្រវត្តិសាស្ត្រ៕