ក្រឡេកមកក្របខ័ណ្ឌ Premier League ឯណេះវិញ ឆ្លងកាត់ការប្រកួតជុំទី ២៩ កាលពីយប់មិញ ក្រុមមេឃខៀវ Manchester City បានបង្ហាញភាពខ្លាំងរបស់ខ្លួនឡើងវិញហើយ តាមរយៈការយកឈ្នះ ៥-២ ទៅលើ Southampton។ ៣ ពិន្ទុនៅជ័យជម្នះនោះ រុញឲ្យក្រុម City មាន ៦៨ ពិន្ទុបន្ថែមគម្លាត ១៤ ពិន្ទុលើ United ខណៈ Southampton ធ្លាក់មកលេខ ១៤។
ទៅមើលស្ថិតិប្រកួតបន្តិច ក្រុមម្ចាស់ដី Etihad មានឱកាសស៊ុតច្រើនដល់ទៅ ១៧ លើក ហើយចំគោលដៅ ១០ លើក តាមរយៈការគ្រប់គ្រងបាល់ ៥៩ ភាគរយ និងមានអត្រាបញ្ជូនបាល់ជោគជ័យ ៩១ ភាគរយ។ រីឯក្រុមភ្ញៀវស៊ុត ១១ លើក ចំគោលដៅ ៦ លើក គ្រប់គ្រងបាល់ ៤១ ភាគរយ និងអត្រាបញ្ជូនបាល់ជោគជ័យ ៨១ ភាគរយ។
គ្រាប់បាល់បើកឆាកកើតឡើងនៅនាទី ១៥ ធ្វើបានដោយ Kevin de Bruyne មុនពេល James Ward-Prowse របស់ក្រុមភ្ញៀវមានឱកាសស៊ុតបាល់ ១១ ម៉ែត្រតាមស្មើ។ លុះដល់នាទី ៤០ Riyad Mahrez ក៏បានបន្ថែមគ្រាប់បាល់ទីពីរ ហើយដល់នាទី ៤៥+៣ Ilkay Gundogan បន្ថែមគ្រាប់បាល់ទីបីមួយទៀតមុនបិទវគ្គទី ១។
ចូលដល់វគ្គទី ២ បើកឆាកបានជាង ១៥ នាទីស្រាប់តែ Mahrez ធ្វើបានគ្រាប់បាល់ទី ២ សម្រាប់ខ្លួនឯង ហើយរំលង ១ នាទី Che Adams ដាក់មួយគ្រាប់សងវិញ តែនៅ ៣ នាទីបន្ទាប់ Kevin de Bruyne យកបានគ្រាប់បាល់ទី ៥ ឲ្យ City ហើយរក្សាលទ្ធផលដល់បញ្ចប់ការប្រកួត៕
ទស្សនាវីដេអូខាងក្រោម៖