ក្លឹបមេឃខៀវ Manchester City ត្រូវបានគេរាយការណ៍ថា ពុំហ៊ានលូកដៃក្នុងការចរចាជាមួយក្លឹប Paris Saint-Germain នោះទេ លើការចង់បាន Kylian Mbappe នោះក៏ដោយសារតែថ្លៃពលកម្មរបស់គេខ្ពស់ជ្រុលដល់ទៅ ៦០០ ០០០ ផោន/សប្ដាហ៍។
យុវជនវ័យ ២២ ឆ្នាំនៅជាប់កុងត្រាជាមួយ PSG ដល់ឆ្នាំ ២០២២ តែលោក Leonardo ក៏បានបង្ហើបមុននេះហើយដែរថា គេនឹងធ្វើការសម្រេចចិត្តថាបន្តឬចាកចេញនៅពេលដ៏ខ្លីខាងមុខ ហើយប្រសិនគិតចង់ចាកចេញ នោះនឹងធ្វើឡើងនៅទីផ្សារដោះដូររដូវក្តៅ។
យ៉ាងណាតាមរបាយការណ៍ពី The Athletic បានចុះផ្សាយថា City ក៏ចង់បានខ្សែប្រយុទ្ធថ្មីមកជំនួស Sergio Aguero ដែរ ហើយកាន់តែចង់បាន Mbappe ថែមទៀត ប៉ុន្តែដោយសារលទ្ធភាពក្នុងការចំណាយមានកម្រិត ហើយមិនអាចផ្គត់ផ្គង់ប្រាក់ ៦០០ ០០០ ផោន/សប្តាហ៍លើកីឡាករម្នាក់បាននោះឡើយ ណាមួយបញ្ហាហិរញ្ញវត្ថុសព្វថ្ងៃមិនជាល្អផងនោះ។
ផ្ទុយទៅវិញក្រុមដឹកនាំដោយលោក Pep Guardiola អាចជានឹងបង្វែររ៉ាដាទៅសម្លឹងឃើញ Erling Haaland ជំនួស ដោយតម្លៃផ្ទេររបស់គេអាចថ្លៃក្រោម ៨០ លានអឺរ៉ូ ហើយថ្លៃពលកម្មតែប្រមាណ ១៤១ ០០០ ផោន/សប្តាហ៍តែប៉ុណ្ណោះ៕
ប្រភព៖ Sportsmole