Ilias “Tweety” Ennahach នៅតែជាម្ចាស់ខ្សែក្រវាត់ពិភពលោក ONE Flyweight Kickboxing World Champion ក្រោយយកឈ្នះគូប្រជែងលំដាប់លេខ២ “The Kicking Machine” Superlek Kiatmoo9 នៅព្រឹត្តិការណ៍ ONE: FISTS OF FURY ដោយពិន្ទុជាឯកច្ឆន្ទ។
បុរសកូនកាត់ហូឡង់-ម៉ារ៉ុកការពារខ្សែក្រវាត់លើកទី២បានសម្រេចនៅកីឡដ្ឋាន Singapore Indoor Stadium នាប្រទេសសិង្ហបុរីនាយប់ថ្ងៃសុក្រទី ២៦ ខែ កុម្ភៈ យប់មិញ។
នាទឹកដំបូងមើលទៅមិនពិបាកទេសម្រាប់ Ennahachi ខណៈដែល Superlek រេរាប្រើស្នៀតទាត់ពីចម្ងាយ។បុរសវ័យ ២៤ ឆ្នាំមកពី ក្រុង Utrecht មិននៅនឹងថ្កល់ឡើយ។ គេបម្លាស់ទីរហ័ស, ជំហររឹង និងវ៉ៃចូលផ្ទៃមុខដៃគូលឿនៗញាប់ស្មេរ ហើយថែមទាំងទាត់ជើងក្រោមដើម្បីទប់ដៃគូទៀតផង។ បុរសមកពីក្លិប Kiatmoo9 ប្រើស្នៀតទាត់ខ្លាំងៗ តែក៏ពិបាកការពារកណ្ដាប់ដៃលឿនរបស់ Ennahachi ដែរ។
Superlek ដែលជាជើងឯកមួយថៃពិភពលោកច្រើនសម័យល្អតែខាងទាត់ប៉ុណ្ណោះ ប៉ុន្តែម្ចាស់ខ្សែក្រវាត់អាចការពារបានល្អនៅទឹកទី២។ Ennahachi អាចវ៉ៃចូលទទួលបានពិន្ទុជាច្រើន , ធ្វើឲ្យកីឡាករថៃផ្ងាកក្រោយ និងប្រើកណ្ដាប់ដៃញាប់ចូលមុខដែលតារាថៃមើលសឹងមិនចង់ទាន់។
ទឹកទី៣ក៏មិនខុសគ្នាប៉ុន្មានដែរ ប៉ុន្តែ “The Kicking Machine” ដើរសំដៅទៅមុខរហូតដើម្បីរកចន្លោះទាត់។គេចង់ទាត់បំបាក់ដៃស្ដាំរបស់ Ennachachi ដែលកំពុងឡើងក្រហមឆ្អៅ ប៉ុន្តែ ម្ចាស់ខ្សែក្រវាត់មិនឲ្យចំធ្ងន់ៗពេកទេ។ បុរសមកពីហូឡង់អាចដោះស្រាយបាន និង ប្រើស្ទិលចូលឆ្មក់កណ្ដាប់ដៃលឿនៗដដែល។
Superlek គ្រប់គ្រងលើការទាត់ ស្របពេល Ennahachi ឆក់ចូលវ៉ៃម្ដងៗធ្វើឲ្យរង្គើតារាថៃផងដែរ។ Superlek ទាត់មិនឈប់នៅទឹកចុងក្រោយ ខណៈ “Tweety” មិនបង្អង់ក្នុងការវាយសងដោយកណ្ដាប់ដៃ ឬ ទាត់ក្រោមនោះឡើយ។ក្រោយចប់ការប្រកួតតារាទាំងពីរមានសង្ឃឹមរៀងៗខ្លួន។ ប៉ុន្តែ ចៅក្រមកាន់ក្ដីទាំង ៣ បានផ្ដល់ពិន្ទុឈ្នះដោយឯកច្ឆន្ទលើ Ennahachi។
«ខ្ញុំគិតថា ខ្ញុំអាចយកពិន្ទុបានច្រើនទៀត។ គេប្រើស្នៀតទាត់ច្រើន ប៉ុន្តែ ខ្ញុំចល័តច្រើនដែរ និងអាចឆក់ស្នៀតកណ្ដាប់ដៃចូលជាច្រើន»។ ម្ចាស់ខ្សែក្រវាត់ World Champion ថ្លែងបែបនេះក្រោយចប់ការប្រកួត។
ក្រោយជ័យជម្នះនេះ Ennahachi រក្សាកំណត់ត្រាល្អឥតខ្ចោះនៅសង្វៀន ONE Super Series ហើយកើនកំណត់ត្រាឈ្នះរហូតដល់ ៣៧ ដង និងចាញ់តែ ៣ដងប៉ុណ្ណោះ។ គេបានព្រលយពាក្យចង់ជួបតារាកំពូល Rodtang “The Iron Man” Jitmuangnon ក្រោយម្ចាស់ខ្សែក្រវាត់ ONE Flyweight Muay Thai World Champion ឈ្នះលើកដំបូងក្នុងការប្រកួតឃីកបុកសីងនាយប់ជាមួយគ្នានេះ។
“Tweety” សប្បាយចិត្តក្នុងការទទួលពាក្យប្រកួតប្រជែង និង ដាក់ផែនការដើម្បីជួបគ្នានៅថ្ងៃអនាគតដ៏ខ្លីខាងមុខ។ Ennahachi បញ្ជាក់ ៖«ពិតណាស់ ហេតុអ្វីមិនអាច? ខ្ញុំជាជើងឯក គេជាជើងឯក។ ជើងឯកប៉ះជើងឯក។ បន្ទាប់មកនឹងទទួលបានជើងឯកដ៏ខ្លាំងក្លាម្នាក់»។
“Tweety” សង្កត់ធ្ងន់ ៖«បន្ទាប់ពីការប្រកួតនេះ ពេលខ្ញុំខ្ញុំយកឈ្នះ Rodtang ខ្ញុំនឹងសាកទៅប្រកួត MMA ម្ដង ហើយខ្ញុំចង់ជួប Demetrious Johnson។ ពេលឈ្នះពីរ ឬ បីប្រកួតក្នុងគុនចម្រុះ ខ្ញុំនឹងអាចឡើងទៅជួបវីរបុរស Demetrious Johnson បានហើយ»។