នៅយប់នេះក្រុមតោខៀវ Chelsea នឹងត្រូវបើកការប្រកួតទល់ Southampton ដែលជាការប្រកួតក្រៅដីលើកទី ៣ ស្ថិតក្រោមការដឹកនាំរបស់គ្រូថ្មីលោក Thomas Tuchel។ ការប្រកួតដែលប្រព្រឹត្តិទៅនៅវេលាម៉ោង ០៧:៣០ នាទីយប់នេះ នឹងមានផ្សាយផ្ទាល់នៅលើទំព័រ CTS Sports។
នៅរាត្រីនេះដែរ លោក Tuchel ក៏នឹងមានឱកាសអាចតាមស្មើកំណត់ត្រាចាស់ដ៏អស្ចារ្យមួយរបស់លោក Carlo Ancelotti នោះគឺការឈ្នះក្រៅដី ៣ ប្រកួតជាប់គ្នាសម្រាប់ការដឹកនាំដំបូងនៅ Chelsea។ បញ្ជាក់ថា ៦ ប្រកួតសរុបកន្លងមក Tuchel យកជ័យជម្នះបាន ៥ និងស្មើ ១។
លើកចុងក្រោយដែល Chelsea មានគ្រូដឹកនាំឈ្នះក្រៅដី ៣ ប្រកួតដំបូងជាប់គ្នានោះគឺជំនាន់លោក Ancelotti កាលពីឆ្នាំ ២០០៩ ហើយប៉ុន្មានឆ្នាំក្រោយៗមកឆ្លងកាត់គ្រូជាច្រើនរូបមិនទាន់មាននរណាធ្វើបាននៅឡើយ។
បញ្ជាក់ថា Chelsea បច្ចុប្បន្នកំពុងឈរលេខ ៤ នៅតារាង Premier League ដោយនៅចាញ់ ៤ ពិន្ទុធៀបនឹងក្រុម Man Utd ដែលឈរលេខ ២ ហើយដាច់ឆ្ងាយធៀបនឹង Man City។ រីឯ Southampton ឈរលេខ ១៣ ក្រោយចាញ់ ៦ ប្រកួតជាប់ៗគ្នានារយៈពេលចុងក្រោយ៕
ប្រភព៖ Sportsmole