ក្រុមហង្សក្រហម Liverpool បានបរាជ័យក្រោមថ្វីជើងក្រុម Brighton ក្នុងលទ្ធផល ១-០ សម្រាប់ការប្រកួតពានរង្វាន់ English Premier League នាយប់មិញនេះ។
បរាជ័យនេះបានធ្វើឱ្យក្រុម Liverpool កាន់តែឆ្ងាយមែនទែនហើយសម្រាប់ការប្រជែងពានរង្វាន់ជាមួយក្រុម Manchester City ។ ដោយបច្ចុប្បន្ននេះក្រុមហង្សក្រហម ចាញ់៧ពិន្ទុនិងខាងក្រុម Man City នៅសល់១ប្រកួតក្នុងដៃថែមទៀត។ ប្រសិនបើ១ប្រកួតនោះពួកគេឈ្នះទៀត មានន័យថាគម្លាតពិន្ទុដល់ទៅ១០ពិន្ទុទៅហើយ។
សម្រាប់គម្លាតនេះ Andy Robertson បាននិយាយថា៖ “ចំណាត់ថ្នាក់នៅពេលនេះ យើងមិនមែនជាក្រុមប្រជែងពានរង្វាន់ទេ។ យើងនៅពីក្រោម៧ពិន្ទុពីពួកគេ ហើយពួកគេសល់១ប្រកួតក្នុងដៃទៀត។ ខ្ញុំគិតថាបើសិនពួកគេកំពុងនៅចំណាត់ថ្នាក់ដូចយើង ក៏ពួកគេនិយាយដូចខ្ញុំពេលនេះដែរ។ គម្លាតពិន្ទុនេះពិតជាឆ្ងាយនិងពិបាកតាម”៕ប្រភព Dailymail
