លោក Thomas Tuchel បាននិយាយថាលោកដឹងច្បាស់ណាស់ថាលោកនឹងត្រូវក្រុម Chelsea បណ្ដេញចេញហើយ ប្រសិនបើមិនអាចដឹកនាំក្រុមទទួលបានពានរង្វាន់ណាមួយទេនោះ។
ក្រុមតោខៀវ Chelsea នឹងត្រូវប្រកួតជាមួយក្រុម Burnley នៅម៉ោង៧ល្ងាចនេះ សម្រាប់ពានរង្វាន់ English Premier League ។ ដោយនេះជាប្រកួតទី២ក្រោមការដឹកនាំរបស់លោក Thomas Tuchel អ្នកចាត់ការថ្មី ចូលខ្លួនមកជំនួសតំណែងរបស់ Frank Lampard ដែលត្រូវក្លឹបដកចេញកាលពីសប្ដាហ៍មុន។ អ្នកចាត់ការអាល្លឺម៉ង់នេះដែរមកដឹកនាំក្រុមតោខៀវនេះ មានកុងត្រារយៈពេល១៨ខែ។
លោក Tuchel បាននិយាយចំពោះអនាគតរបស់លោកនៅក្រុម Chelsea ថា៖ “ដំបូងឡើយ ខ្ញុំភ្ញាក់ផ្អើលនៅពេលមានកុងត្រា១៨ខែ តែក្រោយមកខ្ញុំក៏យល់រឿងនេះ។ តើមានប្រយោជន៍អីបើពួកគេផ្ដល់ឱ្យខ្ញុំ៤ឆ្នាំកន្លះ តែត្រូវបណ្ដេញចេញ១ឆ្នាំបន្ទាប់ នៅពេលយើងធ្វើមិនបានល្អ ហើយពួកគេមិនសប្បាយចិត្ត។ វាគ្មានខុសគ្នាអ្វីទេ សំខាន់យើងត្រូវរកលទ្ធផលល្អឱ្យក្រុមឱ្យបានសិន”៕
ប្រភព៖ DailyMail