ក្លឹប AC Milan បានរបូតឱកាសឆ្ពោះទៅកាន់វគ្គ ៤ ក្រុមចុងក្រោយ ពានរង្វាន់ Coppa Italia បន្ទាប់ពីបរាជ័យក្រោមថ្វីជើងរបស់ Inter Milan នៅលទ្ធផល ២-១។
ដំបូងឡើយ Zlatan Ibrahimovic ជាអ្នកបើកគ្រាប់បាល់នាំមុខ ប៉ុន្តែក្រោយគេរងពិន័យកាតលឿងទី ២ ស្មើនឹងកាតក្រហម ១ ក្រុមក៏ចាប់ផ្តើមធ្លាក់ឱកាសវាយសម្រុក និងទប់រហូតដល់របូតផ្តល់បាល់ ១១ ម៉ែត្រឲ្យខាង Inter ស៊ុតយកស្មើថែមទៀត។ លុះដល់នាទី ៩០+៧ Christian Eriksen គេស៊ុត Free Kick បញ្ចូលទី ជួយឲ្យ Inter ឈ្នះទាល់តែបាន។
និយាយក្រោយចប់ការប្រកួត អ្នកចាត់ការរបស់ AC Milan លោក Stefano Pioli ថាក្រុមខ្លួនធ្វើបានល្អហើយ ខុសត្រង់តែការបាត់បង់កីឡាករម្នាក់ប៉ុណ្ណោះ។ ប្រាប់ទៅកាន់ Rai Sport៖ “វាជាការខក.ចិត្តមួយព្រោះយើងយកចិត្តទុកដាក់នឹងពានរង្វាន់នេះ ហើយការបង្ហាញទម្រង់លេងរបស់យើងគឺរឹងមាំហើយ តែពេលបាត់បង់កីឡាករម្នាក់គឺធ្វើឲ្យយើងលំបាក”។
លោកបន្ត៖ “ខ្ញុំមានអារម្មណ៍វិជ្ជមានលើប្រកួតនេះ ហើយមានការជឿទុកចិត្តពីអនាគតរបស់យើង ជាជាការប្រកួតទល់ Atalanta ដោយវាមានតុល្យភាព ហើយអ្វីដែលខុសប្លែកគឺត្រង់យើងបាត់បង់កីឡាករម្នាក់ ប្រសិនលេង ១១ ទល់ ១១ គឺនឹងមានលទ្ធផលផ្សេង ស្របពេលយើងនាំមុខ ១-០ មុនហើយនោះ”៕
ប្រភព៖ AF