ការប្រកាសផ្លូវការនៅការផ្ទេរក្នុងលក្ខខណ្ឌខ្ចីជើងរបស់ Martin Odegaard មកចូលរួមនៅក្លឹប Arsenal អាចនឹងត្រូវបង្ហាញក្នុងពេលដ៏ខ្លីខាងមុខ ក្រោយក្លឹបទាំងពីរឆ្លងកាត់ការពិភាក្សាប៉ុន្មានថ្ងៃយ៉ាងមមាញឹក។
តាមដំណឹងចុងក្រោយបានឲ្យដឹងថា កិច្ចព្រមព្រៀងនោះទំនងជាឈានដល់ភាពជោគជ័យហើយ ខណៈខ្សែបម្រើវ័យ ២២ ឆ្នាំនឹងបង្ហាញខ្លួនជាមួយក្រុមកាំភ្លើងធំមុនដំណាច់ខែមករានេះ។ ប្រភពពី The Timesចុះផ្សាយថា Arsenal នឹងទូទាត់ប្រាក់ ២ លានអឺរ៉ូ ជាថ្នូរលើការផ្ទេរ និងបន្ថែមថ្លៃពលកម្មមួយផ្នែកផ្សេងទៀតទៅកាន់ភាគីខាងក្លឹប Real Madrid។
យ៉ាងណាមិញក្នុងកិច្ចកុងត្រានោះ គឺ Arsenal ពុំមានសិទ្ធទិញផ្តាច់នៅចុងរដូវកាលទេ បែបនេះធានាបានថា Odegaard នឹងនៅតែត្រូវវិលត្រលប់មក Los Blancos វិញនារដូវកាលក្រោយ។
បញ្ជាក់ថាកីឡាករន័រវែសរដូវកាល ២០២០/២១ គេកាន់តែខ្សត់ខ្សោយទៅនូវពេលវេលាបង្ហាញខ្លួនលើទីលាន ដោយឈរជើងបានត្រឹម ៣៦៧ នាទីគត់ និងភាគច្រើនជាកីឡាករបម្រុងនៅ ៩ ប្រកួត៕
ប្រភព៖ Marca