អ្នកចាត់ការរបស់អតីតអ្នកប្រដាល់ក្បាច់គុណចម្រុះ Conor McGregor លោក Audi Attar បាននិយាយថា Floyd Mayweather បានបដិសេធមិនឡើងសង្វៀនសារជាថ្មីជាមួយគូសត្រូវចាស់ McGregor ឬ Pacquiao ព្រោះដោយសារភ័យខ្លាច នឹងការបរាជ័យ។
បញ្ជាក់ថា Mayweather បានតតាំង Pacquiao កាលពីខែឧសភា ឆ្នាំ ២០១៥ ហើយកាលនោះ Floyd ឈ្នះដោយពិន្ទុ។ រីឯពេលប៉ះ McGregor នៅប៉ុន្មានឆ្នាំបន្ទាប់ គឺ Floyd យកឈ្នះនៅតឹកទី ១០។
ប្រាប់នៅកម្មវិធី Dubai Eye 103.8 Sport លោក Attar និយាយបែបនេះថា៖ “ខ្ញុំជឿថាបើ Conor ប៉ះ Floyd ម្តងទៀត នោះ Conor នឹងឈ្នះ ដោយខ្ញុំមិនជឿថា Floyd អាចធ្វើបានទេ ស្របពេលដែលគេបែរជាកំពុងយកតារា Youtuber មកលេងដើម្បីបានលុយ ទាំងដែលការពិតទៅគេក៏អាចប្រកួតម្តងទៀតទល់ Manny Pacquiao និង McGregor តែអ្នកមិនឃើញ Floyd គេទទួលប្រកួតនោះទេ”។
លោកបន្ថែមទៀតថា៖ “តែគេបែរជាហ៊ានតទល់ Logan Paul ឬទៅថ្ងៃមុខគេអាចនឹងវាយម្តងទៀតជាមួយអ្នកប្រដាល់ជប៉ុន [Nasukawa] ព្រោះគេដឹងខ្លួនគេហើយថា នឹងចាញ់ ប្រសិនតតាំងទល់រវាង Pacquiao ឬ McGregor”៕
ប្រភព៖ GiveMeSport