វិស័យប្រដាល់ ក៏មិនខុសពីវិស័យកីឡាបាល់ទាត់និងកីឡាមួយចំនួនផ្សេងទៀត ដែលរៀងរាល់ការប្រកួតខ្នាតធំអាចរកបានចំណូលខ្ទង់លានដុល្លារឯណោះ។
ប្រាក់ចំណូលមួយផ្នែកធំ គឺទទួលបានពីក្រុមហ៊ុនដែលជាម្ចាស់ឧបត្ថម្ភនៃព្រឹត្តិការណ៍ឬកម្មវិធីមួយនោះ ហើយមួយផ្នែកផ្សេងទៀតគឺទទួលបានពីការលក់សំបុត្រទាំងនៅទីតាំងផ្ទាល់ និងសំបុត្រទស្សនាតាមប្រព័ន្ធអ៊ីនធឺណិត ឬយើងនិយមស្គាល់ថា PPV និងចំណូលបន្ទាប់បន្សំមានដូចជាការលក់សិទ្ធផ្សព្វផ្សាយលើប៉ុស្តិ៍ទូរទស្សន៍ឬប្រព័ន្ធផ្សព្វផ្សាយបន្តណាមួយជាដើម។
អ្នកធ្លាប់ដឹងទេថា តើប្រកួតណាខ្លះនៅក្នុងប្រវត្តិសាស្ត្រវិស័យប្រដាល់ដែលអាចបង្កើតចំណូលច្រើនជាងគេបង្អស់? CTS Sports នាំឲ្យស្គាល់ប្រកួតធំៗទាំង ៦ ដូចតទៅ៖
៦) ការប៉ះគ្នារវាង Lennox Lewis និង Mike Tyson នៅឆ្នាំ ២០០២
ការប្រកួតក្នុងទឹកដីសហរដ្ឋអាមេរិកកាលនោះ មានអ្នកចូលរួមទស្សនាផ្ទាល់ប្រមាណ ១៥ ០០០ នាក់ នាំឲ្យចំណូលទទួលបានពីការលក់សំបុត្រនៅទីតាំងផ្ទាល់ទទួលបានជាង ១៩ លានដុល្លារ ហើយការលក់សំបុត្រ PPV បានជាង ១២៣ លានដុល្លារ រីឯកីឡាករប្រដាល់ទាំងពីរ ទទួលបានម្នាក់ជាង ១៩ លានដុល្លារផ្សេងទៀត។ រុញឲ្យចំណូលសរុបកាលនោះឡើងដល់ ១៨១ លានដុល្លារ។
៥) ការប៉ះគ្នារវាង Evander Holyfield និង Mike Tyson លើកទី ២ នៅឆ្នាំ ១៩៩៧
នៅឆ្នាំ ១៩៩៦ អ្នកទាំងពីរធ្លាប់ប៉ះគ្នាម្តងហើយ ដោយលើកទី ១ គឺ Holyfield ទទួលបានជ័យជម្នះ លុះរំលងមួយឆ្នាំបន្ទាប់ Tyson ក៏មានឱកាសសងសឹកតែនៅបន្តរងបរាជ័យដដែល។ ក្រឡេកទៅមើលប្រាក់ចំណូលរួមនៅកម្មវិធីកាលនោះវិញ គឺមានដល់ជិត ២០០ លានដុល្លារឯណោះ ហើយ Holyfield កើបលុយចូលហោប៉ៅបានជាង ៣៨ លានដុល្លារ ខណៈ Tyson បានជាង ៣៣ លានដុល្លារ។
៤) ការប៉ះគ្នារវាង Floyd Mayweatherនិង De La Hoya នៅឆ្នាំ ២០០៧
ប្រកួតនោះត្បិត Mayweather ទទួលបានជ័យជម្នះក៏ពិតមែន ប៉ុន្តែប្រាក់ចំណូលគេទទួលបានតែជាង ២៧ លានដុល្លារប៉ុណ្ណោះ ស្របពេលដែល De la Hoya បានជាង ៥៧ លានដុល្លារ។ ប្រាក់ចំណូលសរុបក្នុងកម្មវិធីទាំងមូលមានដល់ជាង ២៥៥ លានដុល្លារ។
៣) ការប៉ះគ្នារវាង Floyd Mayweatherនិង Canelo Alvarez នៅឆ្នាំ ២០១៣
សំបុត្រ PPV កាលនោះលក់ដាច់បានដល់ ២,២ លានសន្លឹក កើបចំណូលបានជាង ១៦៤ លានដុល្លារ ខណៈចំណូលដែលទទួលបានពីអ្នកទស្សនានៅឯអគារ MGM Grand ក្នុងទីក្រុង Las Vegas ផ្ទាល់បានតែជាង ២៧ លានដុល្លារ។ Mayweather ឆ្នាំនោះកើបលុយបានជិត ៨៩ លានដុល្លារ ច្រើនជាង ១ ទ្វេជា ៦ ធៀបនឹង Canelo។ ចំណូលរួមនៅឆ្នាំនោះមានជាង ២៩៣ លានដុល្លារ។
២) ការប៉ះគ្នារវាង Floyd Mayweatherនិង Conor McGregor នៅឆ្នាំ ២០១៧
នេះជាជំនួបកើបលុយលើគោក “The Money Fight” ដែលតារាឆ្នើមលើសង្វៀន UFC មកប៉ះគ្នានឹងប្រដាល់មិនដែលចាញ់ Mayweather។ កាលនោះសំបុត្រ PPV លក់ដាច់ខ្លាំង កើបលុយបានជាង ៤៤៤ លានដុល្លារ ហើយ McGregor បាន ៩៥ លានដុល្លារចូលហោប៉ៅបើទោះបីជារងបរាជ័យ ដែលចំនួននេះតិចជាង ១ ទ្វេជា ៣ ធៀបនឹង Floyd។ ចំណូលរួមឆ្នាំនោះកើនដល់ ៩០៥ លានដុល្លារ។
១) ការប៉ះគ្នារវាង Floyd Mayweatherនិង Manny Pacquiao នៅឆ្នាំ ២០១៥
កម្មវិធីនេះត្រូវបានគេដាក់ឈ្មោះឲ្យថា “Fight of The Century” ដែលជាការជួបគ្នារវាងគីឡូធ្ងន់នៅតំបន់អាស៊ីគឺ Manny Pacquiao និងអ្នកប្រដាល់អាមេរិក Floy Mayweather។ វាក៏ជាថ្ងៃដែលបំបែកកំណត់ត្រាការលក់សំបុត្រ PPV ដាច់ដល់ ៤,៦ លានសន្លឹក ហើយចំណូលពីការលក់សំបុត្រទស្សនានៅទីតាំងផ្ទាល់ក៏ជាប្រវត្តិសាស្ត្រមួយដែរ។
Mayweather កាលនោះរកបានជាង ៣០៥ លានដុល្លារ ខណៈ Pacquiao រកបានជាង ១៦៦ លានដុល្លារ រីឯចំណូលពីសំបុត្រ PPV បាន ៤៥៥ លានដុល្លារ និងសំបុត្រនៅទីតាំងផ្ទាល់បាន ៨០ លានដុល្លារ រុញឲ្យចំណូលរួមមានដល់ ៩២៧ លានដុល្លារ៕
ប្រភព៖ TheSun