ជារៀងរាល់ឆ្នាំសហព័ន្ធសមាគមបាល់ទាត់អន្តរជាតិ FIFA រមែងប្រកាសនៅនាមកីឡាករ/កីឡាការនី ក៏ដូចជាអ្នកចាត់ការល្អបំផុតប្រចាំឆ្នាំ ហើយនៅឆ្នាំ ២០២០ នេះ យើងបានរកឃើញអ្នកដែលឈ្នះពានរង្វាន់បុគ្គលទាំងអស់នោះហើយ។
សម្រាប់ពានកីឡាករល្អបំផុតបានទៅលើខ្សែប្រយុទ្ធ Robert Lewandowski របស់ក្លឹប Bayern Munich ខណៈពានកីឡាការនីល្អបំផុតបានទៅលើខ្សែការពារ Lucy Bronze របស់ក្លឹប Manchester City និងពានអ្នកចាត់ការល្អបំផុតគឺលោក Jurgen Klopp និងអ្នកស្រី Sarina Wiegman។
មុនសម្រេចចេញជាលទ្ធផលដូចបង្ហាញខាងលើ FIFA គឺបានបូកសរុបយកតាមសំឡេងគាំទ្ររបស់គ្រូបង្គោលនៃក្រុមជម្រើសជាតិ ប្រធានក្រុម និងស្ថាប័នអ្នកសារព័ត៌មានតំណាងប្រទេសនីមួយៗដែលមានឈ្មោះជាសមាជិកនៅទូទាំងសកលលោក។
ដោយឡែកសម្រាប់កម្ពុជាយើងវិញគឺមានលោក Felix Dalmas តំណាងជាគ្រូបង្គោលផ្នែកបុរស និងលោក អ៊ុំ សាវង្ស ផ្នែកនារី ប្រធានក្រុម សឿយ វិសាល (ផ្នែកបុរស) ប្រធានក្រុម សំរិត និមល (ផ្នែកនារី) និងលោក អ៊ឹង ចំរើន តំណាងស្ថាប័នសារព័ត៌មាន។ ការជ្រើសរើសរបស់បុគ្គលទាំង ៥ មានដូចតទៅ៖
លោក Felix Dalmas បានជ្រើសរើសអ្នកចាត់ការ Marcelo Bielsa, Hans-Dieter Flick និង Julen Lopetegui ហើយសម្រាប់ផ្នែកកីឡាករលោកជ្រើសរើស Lionel Messi, Neymar និង Thiago Alcantara។
ប្រធានក្រុម សឿយ វិសាល បានជ្រើសរើសអ្នកចាត់ការ Jurgen Klopp, Zinedine Zidane និង Julen Lopetegui ហើយសម្រាប់ផ្នែកកីឡាករលោកជ្រើសរើស Cristiano Ronaldo, Kylian Mbappe និង Sergio Ramos។
តំណាងស្ថាប័នសារព័ត៌មានលោក អ៊ឹង ចំរើន បានជ្រើសរើសអ្នកចាត់ការ Hans-Dieter Flick, Jurgen Klopp និង Marcelo Bielsa ហើយផ្នែកកីឡាករលោកជ្រើសរើស Robert Lewandowski, Sergio Ramos និង Mohamed Salah។ ក្រឡេកទៅផ្នែកនារីមានអ្នកចាត់ការ Rita Guarino, Stephan Lerch និង Jean-Luc Vasseur ហើយកីឡាការនីមាន Sam Kerr, Vivianne Miedema និង Pernille Harder។
លោក អ៊ុំ សាវង្ស បានជ្រើសរើសអ្នកចាត់ការ Sarina Wiegman, Lluis Cortes និង Jean-Luc Vasseur ហើយកីឡាការនីមាន Wendie Renard, Delphine Cascarino និង Lucy Bronze។
ចុងក្រោយគឺប្រធានក្រុម សំរុិត និមល ជ្រើសរើសអ្នកចាត់ការ Emma Hayes, Stephan Lerch និង Rita Guarino ហើយផ្នែកកីឡាការនីមាន Ji So-yun, Pernille Harder និង Delphine Cascarino៕