Edinson Cavani បានទម្លាយកាលពីពេលថ្មីៗនេះថា មុនផ្ទេរមកចូលរួមជាមួយក្លឹប Manchester United លោកក៏ទទួលបានសំណើពីក្លឹបយក្ស ២ ផ្សេងទៀតដែរនៅអ៊ីតាលីរួមមាន Juventus និង Inter Milan។
បញ្ជាក់ថា កីឡាករអ៊ុយរុយហ្គាយបានផុតកុងត្រាជាមួយក្លឹបចាស់ Paris Saint-Germain នៅរដូវក្តៅឆ្នាំ ២០២០ ហើយមានក្លឹបជាច្រើនដែលចង់បានលោក តែសម្រាប់ក្លឹបនៅអ៊ីតាលីដូចរៀបរាប់ខាងលើ គឺលោកមិនអាចទៅចូលរួមបានទេ ព្រោះឲ្យតម្លៃដល់អតីតក្លឹបចាស់ Napoli។
ខ្សែប្រយុទ្ធដែលធ្លាប់រួមជើងនៅ Napoli ចន្លោះឆ្នាំ ២០១០-១៣ និយាយថា៖ “ខ្ញុំតែងតែមានការអំណរគុណដល់អ្នកគាំទ្ររបស់ក្លឹប Napoli ដោយហេតុផលហ្នឹងហើយដែលខ្ញុំបដិសេធសំណើក្លឹបនៅអ៊ីតាលីដូចជា Juventus និង Inter Milan”។
លោកសង្កត់ធ្ងន់ទៀតថា៖ “ខ្ញុំមិនអាចធ្វើរឿងបែបហ្នឹងដាក់អ្នកគាំទ្រនៅ Napoli បានទេ ព្រោះឲ្យតែខ្ញុំគិតដល់ទីក្រុង Naples គឺខ្ញុំតែងតែមានអារម្មណ៍រីករាយ ព្រោះខ្ញុំធ្លាប់បានធ្វើរឿងជាច្រើនសម្រាប់ពួកគេ”។
រំឭកដែរថា កីឡាករវ័យ ៣៣ ឆ្នាំ នៅការបង្ហាញខ្លួនឲ្យ United ១០ ប្រកួត គេរកបាន ៣ គ្រាប់និង Assist ១ លើក តាមរយៈការឈរជើង ៣៧៨ នាទីលើទីលាន។ ដោយឡែកនៅប្រកួតយកឈ្នះ Southampton ៣-២ កាលពីចុងខែវិច្ឆិកា Cavani បាន Rating ខ្ពស់ដល់ ៩,០១ ហើយជាប់ឈ្មោះជាកីឡាករបម្រុងបានពិន្ទុខ្ពស់បំផុតមិនធ្លាប់មានតាំងពីរដូវកាល ២០១៦/១៧ ទៀតផង៕
ប្រភព៖ SportBible