អត្រាជោគជ័យលើការផ្ទេរចេញ ៩០ ភាគរយដែល Mesut Ozil នឹងផ្ទេរមកចូលរួមនៅក្លឹបក្នុងប្រទេសទួរគីគឺ Fenerbahce នាខែមករា ឆ្នាំ ២០២១ ខាងមុខ។ នេះបើតាមការលើកឡើងពីសមាជិកក្រុមប្រឹក្សាភិបាលជាន់ខ្ពស់របស់ក្លឹបនៅទីនោះ។
កីឡាករវ័យ ៣២ ឆ្នាំ កាន់តែដុនដាបទៅ ហើយលែងជាចំណែកសំខាន់តទៅទៀតក្រោមការដឹកនាំរបស់លោក Mikel Arteta ដែលរុញឲ្យភាគរយនៃការចាកចេញរបស់គេក្នុងទីផ្សារដោះដូររដូវរងាអាចមានភាគរយខ្ពស់។
កុងត្រារបស់ Ozil សេសសល់ជាមួយ Arsenal ដល់រដូវក្តៅឆ្នាំក្រោយឯណោះ ប៉ុន្តែគេអាចនឹងចរចាសុំចាកចេញត្រឹមខែមករាខាងមុខ ដើម្បីបានលេងជាមួយក្លឹបនៅក្របខ័ណ្ឌ Super Lig។
តាមការបញ្ជាក់ប្រាប់សារព័ត៌មាន Sports Digitale លោក Murat Zorlu សមាជិកក្រុមប្រឹក្សាភិបាលជាន់ខ្ពស់របស់ក្លឹប Fenerbahce និយាយថា៖ “តាមប្រភពជិតស្និទ្ធជាមួយក្លឹបបានប្រាប់ខ្ញុំថា Mesut Ozil គេនឹងក្លាយជាកីឡាកររបស់ក្លឹប Fenerbahce នៅទីផ្សារដោះដូរខាងមុខ ហើយខ្ញុំហ៊ាននិយាយថា ៩០ ភាគរយគេនឹងមកចូលរួមជាមួយពួកយើងនៅរយៈពេល ១ ខែទៀត”៕
ប្រភព៖ Sportsmole