Jomary “The Zamboanginian Fighter” Torres បានសន្យាដល់អ្នកគាំទ្រថានឹងធ្វើល្អឡើងវិញពេលឡើងសង្វៀនជាថ្មី។ កីឡាការិនីហ្វីលីពីនជឿជាក់លើការប្រើស្នៀតកម្រិតកំពូលរបស់គេឡើងវិញ និង កើនចំណាត់ថ្នាក់ក្នុងទម្ងន់ atomweight។
កីឡាការិនីដដែលរួបនេះនឹងឡើងតតាំងជាមួយកីឡាការិនីមិនដែលចាញ់ Ritu “The Indian Tigress” Phogat ក្នុងជំនួបគូបើកឆាកនៃព្រឹត្តិការណ៍ ONE: BIG BANG ដែលនឹងត្រូវផ្សាយផ្ទាល់ពីសង្វៀន Singapore Indoor Stadium នាយប់ថ្ងៃសុក្រទី ៤ ខែ ធ្នូ ចុងសប្ដាហ៍នេះ។
Torres បានថ្លែងអំពី Phogat ដូច្នេះ ៖«និយាយដោយស្មោះត្រង់ទៅ គេជាបេក្ខភាពលំដាប់ពិភពលោកមួយរួប។ ខ្ញុំជឿថា ពេលនេះធ្វើឲ្យគេប្រសើរឡើង ហើយចាប់តាំងពីចូលហ្វឹកហាត់នៅក្លិប Evolve គេមានភាពរីកចម្រើនកាន់ច្រើនឡើង និងទទួលបានការយកចិត្តទុកដាក់ក៏ច្រើនដែរ»។
លើសពីនេះទៀត Phogat បានចាប់ផ្ដើមយ៉ាងល្អបំផុតនៅសង្វៀនសម្បូរដោយតារាគុនចម្រុះលំដាប់ពិភពលោកមួយនេះ។ តាំងពីរបង្ហាញដំបូងខ្លួនកាលខែ វិច្ឆិកា ឆ្នាំ ២០១៩ អ្នកជំនាញចំបាប់សញ្ជាតិឥណ្ឌាបានបំបាក់គ្រប់គូប្រកួតទាំងអស់។
ក្នុងការប្រកួតចុងក្រោយរបស់ Phogat នាពេលថ្មីៗនេះ នៅព្រឹត្តិការណ៍ ONE: INSIDE THE MATRIX កាលខែ តុលា រួបគេផ្ដួលម្ចាស់ខ្សែក្រវាត់គុនខ្មែរ នៅ ស្រីពៅ ឲ្យសន្លប់ត្រឹមទឹកទី២ ប៉ុណ្ណោះ។
ហើយស្នៀតប្រយុទ្ធលើក្ដាររេញ និង ចំបាប់កម្រិតកំពូលជារនាំងឧបសគ្គសម្រាប់ Torres។ កូនសិស្សមកពីក្លិប Catalan Fighting System បានគូបញ្ជាក់ថា ៖«ផ្អែកលើការប្រកួតចុងក្រោយ គេកំពុងស្ថិតនៅកម្រិតកំពូលមួយ។ ការពិត ចំបាប់របស់គេជាអាវុធដ៏សំខាន់បំផុតមួយ ហើយក្បាច់ប្រដាល់របស់គេក៏ល្អណាស់ដែរ។ គេប្រើស្នៀតប្រដាល់ដើម្បីកៀរគូប្រកួតឲ្យដួល។ នោះហើយជារឿងដែលត្រូវប្រយ័ត្នខ្ពស់»។
យ៉ាងណាក្ដី តារាហ្វីលីពីន នៅតែមានទំនុកចិត្តខ្ពស់ ថារួបគេនៅតែមានប្រៀបឈ្នះអីចឹង។
កីឡាការិនីហ្វីលីពីនរៀបរាប់បន្ត ៖«ខ្ញុំគោរពដល់ស្នៀតប្រដាល់របស់គេ។ គេរីកចម្រើនណាស់ ប៉ុន្តែនៅតែគិតថា ខ្ញុំល្អជាង»។
Torres ជាតារាគុនចម្រុះវ័យក្មេងម្នាក់ក្នុងប្រភេទទម្ងន់នេះ។ គេបានផ្ដួលគូប្រកួត ៤ នាក់ដំបូងក្នុងនោះរួមទាំងការបញ្ចប់កីឡាការិនិថ្មី Rika “Tiny Doll” Ishige និងផ្ដួល April Osenio មកពីក្លិប Team Lakay ត្រឹម ៤០ វិនាទីប៉ុណ្ណោះ។
ប៉ុន្តែក្រោយមកទៀត “The Zamboanginian Fighter” រងបរាជ័យលើកីឡាការិនីកំពូលនៅទម្ងន់ atomweight ដូចជារងបរាជ័យលើកីឡាការិនីលំដាប់លេខ៣ “MMA Sister” Lin Heqin និង កីឡាការិនីលំដាប់លេខ៤ Mei “V.V” Yamaguchi។
ភាពបរាជ័យទាំងនេះនឹងធ្វើឲ្យ កីឡាការិនីហ្វីលីពីនកែប្រែកំហុស និងធ្វើបានល្អឡើងវិញដើម្បីកើនចំណាត់ថ្នាក់ទូទៅនៅ ONE’s Athlete Rankings។
ដោយទទួលស្គាល់ថា Phogat ជាអ្នកជំនាញចំបាប់កម្រិតពិភពលោក កីឡាការិនីវ័យ ២៤ រួបនេះបានខិតខំហ្វឹកហាត់ទ្វេដងដើម្បីទប់ទល់នឹងគូប្រជែងជើងខ្លាំងបែបនេះ។
«យើងត្រូវតែក្រឡេកមើលឱកាស។ យើងដឹងថា វាមិនងាយស្រួលទេក្នុងការតតាំងនឹងជើងខ្លាំងចំបាប់។ ប៉ុន្តែ ខ្ញុំបានសិក្សារួចហើយ។ បើមានឱកាសមកដល់ គឺ ត្រូវបញ្ចប់ភ្លាមៗតែម្ដង។ គេល្អ ប៉ុន្តែ មនុស្សតែងតែមានកំហុស។ គេអាចនឹងបង្កើតកំហុស ហើយយើងសង្ឃឹមថាឈ្នះការប្រកួតនេះ»។ Torres តាំងចិត្តបែបនេះ។
ទោះលំបាកយ៉ាងណា Torres បានដាក់គោលដៅក្លាយជាកីឡាការិនីដំបូងដែលអាចផ្ដួល Phogat បាន។
ជ័យជម្នះនេះនឹងធ្វើឲ្យ “The Zamboanginian Fighter” ល្បីឈ្មោះ និង នាំឲ្យអាជីពរបស់ខ្លួនត្រចះត្រចង់ឡើងវិញ ហើយក៏ជាការធ្វើឲ្យគ្រួសារសប្បាយចិត្តដែរ។
Torres ពិពណ៌នាថា ៖«ខ្ញុំមានការលើកទឹកចិត្តពីគ្រួសាររបស់ខ្ញុំ ទោះពួកគេឆ្លងកាត់ការលំបាកជាច្រើនក្ដី។ ហើយការប្រកួតនេះសម្រាប់ប្រជាជនហ្វីលីពីនផងដែរ។ ខ្ញុំតាំងចិត្តដើម្បីទទួលជ័យជម្នះពីការប្រកួតនេះ»។
កីឡាការិនីហ្វីលីពីនសង្កត់បែបនេះ ៖«ខ្ញុំមិនមែនជាមនុស្សចូលចិត្តទស្សន៍ទាយនោះទេ។ [លទ្ធផលបានមកដោយសារប្រកួតរបស់ខ្ញុំ] ប៉ុន្តែ អ្នកគាំទ្រអាចរំពឹងថា វាជាការប្រកួតដ៏ល្អមើល។ ខ្ញុំដាក់ផែនការផ្ដួលគូប្រកួតឲ្យសន្លប់ តាមតែអាចធ្វើទៅបាន»។