អតីតអ្នកប្រដាល់ចូលនិវត្ត Floyd Mayweather បានប្រកាសកាលពីថ្ងៃអាទិត្យកន្លងទៅថា លោកនឹងឡើងសង្វៀននៅប្រកួតមិត្តភាពសារជាថ្មីទល់ YouTuber ល្បីឈ្មោះគឺលោក Logan Paul។
ការប្រកួតនោះនឹងធ្វើឡើងនៅថ្ងៃទី ២០ កុម្ភៈ ឆ្នាំ ២០២១ ដែលអនុញ្ញាតឲ្យមានការទស្សនាតាមរយៈប្រព័ន្ធ Online ដូចការប្រកួតរវាង Mike Tyson និង Roy Jones Jr ដូច្នោះដែរ។
បើតាមការបញ្ជាក់ពីគេហទំព័ររៀបចំព្រឹត្តិការណ៍ខាងលើ សម្រាប់តម្លៃសំបុត្រទស្សនាគឺថ្លៃ ២៤,៩៩ ដុល្លារ នៅការលក់ ១ លានសំបុត្រដំបូង ហើយនិងបន្តឡើងដល់ ៦៩,៩៩ ដុល្លារសម្រាប់ការបញ្ជាទិញក្រោយថ្ងៃទី ១១ ខែកុម្ភៈ។
បង្វែរទៅប្រវត្តិនៃការប្រកួតរបស់អ្នកទាំងពីរ សម្រាប់ Mayweather គឺមិនទាន់ស្គាល់ពាក្យថា ចាញ់ នោះទេនៅការប្រកួត ៥០ លើក ហើយប្រកួតមិត្តភាពលើកចុងក្រោយគឺបានយកឈ្នះទៅលើអ្នកប្រដាល់ជប៉ុន Tenshin Nasukawa នៅឆ្នាំ ២០១៨ ហើយកាលនោះរកបានជាង ៩ លានដុល្លារ។
រីឯ Logan Paul ធ្លាប់ឡើងសង្វៀនពីរលើក តែមិនទាន់ស្គាល់ពាក្យថា “ឈ្នះ” នោះទេ ហើយមានមួយលើកជាលក្ខណៈអាជីពពេលប៉ះ KSI នៅឆ្នាំ ២០១៩ គឺទទួលរងបរាជ័យ។
ក្រឡេកទៅសង្រ្គាមពាក្យសម្តីមុនការប្រកួត Floyd បានបោះពាក្យថា Logan ដូចជាក្មេងស្រី សមតែនៅលេងតុក្កតា Barbie ហើយប្រកួតលើកនេះខ្លួននឹងធ្វើឲ្យគេស្គាល់ថ្នាំខ្លាំង ដូចធ្លាប់ធ្វើដាក់កីឡាករ UFC កាលពី ៣ ឆ្នាំមុន។ តែ Logan ហាក់មិនញញើត និងបានឆ្លើយមួយម៉ាត់យ៉ាងជឿជាក់ថា៖ “៥០-១” ដោយចង់មានន័យថា កំណត់ត្រាមិនស្គាល់ពាក្យថាចាញ់របស់ Floyd នឹងត្រូវបញ្ចប់ត្រឹមកណ្តាប់ដៃរបស់គេនៅឆ្នាំក្រោយនេះហើយ៕
ប្រភព៖ SportBible