Real Madrid នឹងត្រូវបើកការប្រកួតទល់ក្លឹប Inter Milan នៅរាត្រីនេះ ដែលមានផ្សាយផ្ទាល់លើទំព័រ CTS Sports។ មុនឈានដល់ការប្រកួត Luka Modric ក៏បានចេញមកបកស្រាយបន្ថែម ពាក់ព័ន្ធនឹងអនាគតរបស់ខ្លួន ក្រោយមានមន្ទិលសង្ស័យថា គេអាចនឹងចាកចេញនៅពេលខាងមុខ។
ខ្សែបម្រើសញ្ជាតិក្រូអាតមិនសូវបានលេងពេញជើងនោះទេនៅរដូវកាល ២០២០/២១ ក្រោមការដឹកនាំរបស់អ្នកចាត់ការលោក Zinedine Zidane ដោយគិតមកទល់ពេលនេះទើបឈរជើងបានជាង ៧០០ នាទីប៉ុណ្ណោះ។
និយាយនៅសន្និសីទសារព័ត៌មានក្នុងថ្ងៃអង្គារ Modric ថា៖ “ខ្ញុំបាននិយាយជាច្រើនដងហើយ [ថាចង់បន្តនៅ Real Madrid] តែយើងនឹងរង់ចាំមើលថាមានរឿងអ្វីកើតឡើងទៅថ្ងៃខាងមុខ ប៉ុន្តែចម្លើយរបស់ខ្ញុំតែងតែផ្តល់ដដែលៗថា ខ្ញុំមានអារម្មណ៍ល្អនឹងការបន្តនៅទីនេះ”។
លោកបន្ថែមទៀតថា៖ “ខ្ញុំមានអារម្មណ៍ថាអាចជួយក្រុមបាន ហើយក៏ចង់បញ្ចប់អាជីពនៅទីនេះ ប៉ុន្តែវាស៊ីសងលើកត្តាជាច្រើនដែរ គ្រាន់ថាគ្មាននរណាសប្បាយចិត្តជាងខ្ញុំទេ បើអាចបញ្ចប់អាជីពនៅក្លឹប Real Madrid”៕
ប្រភព៖ AF