បន្ទាប់ពីការចាប់ផ្ដើមមិនល្អនៅក្នុងវិបត្តិកូវីដ-១៩ អ្នកលេងឃីកបុកសីង “Golden Boy” Wang Junguang ដាក់ផែនការធ្វើឲ្យអ្នកគាំទ្រទូទាំងពិភពលោកសប្បាយចិត្តបំផុត ជាពិសេសអ្នកគាំទ្រនៅឯស្រុកកំណើតរបស់ខ្លួន។
នៅថ្ងៃសុក្រទី២០ ខែ វិច្ឆិកា ខាងមុខ តារាសញ្ជាតិចិននឹងប្រឈមជើងខ្លាំងមកពីរុស្សី និងជាម្ចាស់ជើងឯកមួយថៃពិភពលោកមកពីអឺរ៉ុប Aslanbek Zikreev ក្នុងនាមជាគូឯកនៅព្រឹត្តិការណ៍ ONE: INSIDE THE MATRIX IV ដែលត្រូវផ្សាយចេញពីប្រទេសសិង្ហបុរី។
Wang បានថ្លែងឲ្យដឹងមុនការប្រកួតថា ៖«ខ្ញុំពិតជាមានមោទកភាពក្នុងការប្រកួតនៅក្រៅប្រទេសសម្រាប់មនុស្សជាទីស្រលាញ់របស់ខ្ញុំក្នុងអំឡុងពេលដ៏ពិសេសនេះ។ ខ្ញុំនឹងនាំយកលទ្ធផលល្អបំផុតត្រលប់ទៅស្រុកកំណើតរបស់ខ្ញុំវិញនៅ Henan ដែលជាក្រុងសម្បូរអ្នកហាត់គុននៅប្រទេសចិន»។
អ្នកដែលឈ្នះក្នុងការប្រកួតនេះនឹងអាចកើនទៅដល់លំដាប់លេខ២ក្នុងក្បាច់ឃីកបុកសីងប្រភេទទម្ងន់ strawweight និងខិតជិតទៅដណ្ដើមខ្សែក្រវាត់ជាថ្មីទល់នឹងម្ចាស់ខ្សែក្រវាត់ Sam-A Gaiyanghadao។
វាមិនមានអ្វីត្រូវសង្ស័យឡើយដែល Wang គឺជាអ្នកមានសមត្ថភាពម្នាក់ និង អាចឈានទៅដណ្ដើមខ្សែក្រវាត់ជាថ្មី។ ជើងខ្លាំងមកពីចិនបានយកឈ្នះ Federico “The Little Big Man” Roma ក្នុងការបង្ហាញខ្លួនលើកដំបូងដោយផ្ដួលកីឡាករអាហ្សង់ទីនរួបនេះឲ្យដួលពីរដងមុនបន្ថែមជង្គង់ និងកណ្ដាប់ដៃឲ្យចុះចាញ់ត្រឹមទឹកទី១។ គ្រានោះ គេបញ្ចប់កីឡាករអាហ្សង់ទីនត្រឹមទឹកដំបូងនេះពេលនៅសល់១វិនាទីមុនបញ្ចប់ការប្រកួត។
បុរសមកពី Henan បានរំលឹកថា ៖«ខ្ញុំបានបង្កើតចន្លោះឱកាសស្វែងរកការចេញស្នៀត ហើយបន្ទាប់មកខ្ញុំប្រើស្នៀតផ្ដួលគេឲ្យដួល។ ខ្ញុំត្រូវតែប្រញាប់បញ្ចប់គេ ព្រោះខ្ញុំមានប្រៀបទៅហើយ។ បន្ទាប់មក ខ្ញុំក៏ស្វែងរកចន្លោះផ្ដួលរូបគេឲ្យដួលម្ដងទៀត។ ខ្ញុំដឹងថា បើដួល៣ដងក្នុងមួយទឹក នោះការប្រកួតនឹងត្រូវបញ្ចប់។ ដូច្នេះខ្ញុំត្រូវតែម៉ាត់ឲ្យខ្លាំងឡើង»។
ជ័យជម្នះលើ Roma បាននាំឲ្យ Wang ឡើងទៅជួប Sam-A កាលខែធ្នូកន្លងទៅក្នុងការប្រកួតដណ្ដើមខ្សែក្រវាត់ឃីកបុកសីងពិភពលោក ONE Strawweight ។
“Golden Boy” ចេញស្នៀតយ៉ាងគឃ្លើន និង បម្លាស់ទីបានល្អក្នុងជំនួបនេះ។ ប៉ុន្តែ វីរបុរសមួយថៃប្រើភាពវៃឆ្លាតវ៉ៃចំគោលដៅជាង និង ល្អគ្រប់គ្រាន់រហូតដល់ឈ្នះពិន្ទុជាឯកច្ឆន្ទដើម្បីរក្សាខ្សែក្រវាត់របស់ខ្លួន។
យ៉ាងណាក្ដី រឿងនេះមិនបានធ្វើឲ្យ Wang បាត់បង់ការតាំងចិត្តនោះឡើយ។ លើសពីនេះទៅទៀតបុរសវ័យ ២៥ ឆ្នាំបានកែប្រែពីបរាជ័យទៅជាការលើកទឹកចិត្ត និងដាក់គោលដៅទៅដណ្ដើមខ្សែក្រវាត់ជាថ្មី។
Wang បានបញ្ជាក់ថា ៖«ខ្ញុំបានដឹងថា ខ្ញុំធ្វើឲ្យអ្នកគាំទ្ររបស់ខ្ញុំខកចិត្តពីការដណ្ដើមខ្សែក្រវាត់ពិភពលោកកាលពេលមុន។ ប៉ុន្តែ ខ្ញុំនៅតែគិតថា ខ្ញុំអាចយកឈ្នះ Sam-A បាន»។
កីឡាករទម្ងន់ Strawweight សង្កត់ធ្ងន់៖«បច្ចុប្បន្ន ខ្ញុំគ្រាន់តែផ្ដល់បញ្ហាខ្លួះៗដល់រូបគេប៉ុណ្ណោះក្នុងប្រភេទទម្ងន់នេះ។ សូមជឿជាក់លើខ្ញុំ ខ្ញុំនឹងផ្ដល់បញ្ហាកាន់តែធំដល់ Sam-A នាពេលក្រោយទៀត។ ខ្ញុំនឹងដណ្ដើមខ្សែក្រវាត់ត្រលប់មកវិញ និង ក្លាយជាកីឡាករកាន់ខ្សែក្រវាត់ពិភពលោក ONE World Champion ដំបូងពីប្រទេសចិន»។
ដើម្បីសម្រេចបំណងទៅថ្ងៃមុខ Wang ត្រូវឆ្លងឲ្យផុត Zikreev ដែលបង្ហាញខ្លួនយ៉ាងល្អបំផុតនៅសង្វៀនអន្តរជាតិ ONE លើកដំបូង។
មិនខុសគ្នាប៉ុន្មាន កីឡាកររុស្សីក៏មិនធម្មតាដែរ ព្រោះគេមានស្នៀតល្អបំផុតទាំងការទាត់ និងវ៉ៃចេញ ជាពិសេសស្នៀតវ៉ៃដងខ្លួនក៏អស្ចារ្យដែរ។ Wang នឹងសម្លឹងមើលចន្លោះប្រហោង, ទប់ស្នៀតរបស់គូបដិបក្ខ ហើយ វាយសងវិញដោយគុណភាព។
ប៉ុន្តែ បើសិន “Golden Boy” អាចទទួល «ជ័យជម្នះដ៏ល្អឥតខ្ចោះ» គេនឹងមានឱកាសទៅបង្កើតកំណត់ត្រាជាប្រវត្តិសាស្ត្រក្នុងការដណ្ដើមខ្សែក្រវាត់លើកទី២នៅថ្ងៃអនាគត៕