ខ្សែប្រយុទ្ធព័រទុយហ្គាល់ Cristiano Ronaldo កំពុងស្ថិតក្នុងចចាមអារ៉ាមនៃការដោះដូរស្មើជាមួយ Neymar Jr ពាក់ព័ន្ធនឹងការផ្ទេរចេញក្នុងពេលខាងមុខ។ នេះបើតាមរបាយការណ៍ពី TuttoMercatoWeb បានចុះផ្សាយ។
ក្លឹប Juventus ក៏កំពុងគិតគូរលើរឿងរ៉ាវនេះ ដោយចង់ប្រគល់ Ronaldo ឲ្យ PSG ហើយទាញយក Neymar មក Juventus ពោលជាការដោះដូរស្មើដើម ហើយគ្មានការបន្ថែមប្រាក់ទូទាត់អ្វីទាំងអស់។ អ្នកទាំងពីរសុទ្ធតែជាកីឡាករដែលត្រូវផុតកុងត្រានៅឆ្នាំ ២០២២ ដូចៗគ្នា។
ការសម្រេចបែបណានោះរវាងភាគីទាំងពីរ មិនទាន់មានការចុះផ្សាយនៅឡើយ តែគេជឿថាភាគរយច្រើន CR7 ទំនងមិនបន្តកុងត្រាថ្មីនោះទេ ជាពិសេសគឺប្រសិនណាសេះបង្កង់មិនអាចឈ្នះពានរង្វាន់ UEFA Champions League រដូវកាលនេះ។
នៅរយៈពេលជាង ២ ឆ្នាំជាមួយក្លឹបមានមូលដ្ឋាននៅទីក្រុង Turin ខ្សែប្រយុទ្ធវ័យ ៣៥ ឆ្នាំ រកបាន ៧១ គ្រាប់និង Assist ១៩ លើកនៅការបង្ហាញខ្លួន ៩៤ ប្រកួតសរុប៕ ប្រភព៖ AF