ក្លឹប Chelsea ត្រូវបានគេដឹងថាយល់ព្រមទិញយកអ្នកចាំទី Kepa Arrizabalaga ក្នុងតម្លៃខ្លួនបំបែកកំណត់ត្រាពិភពលោក ៧២លានផោនពីក្លឹប Athletic Bilbao។
ការចង់បានអ្នកចាំទីវ័យក្មេងខាងលើនេះ កើតឡើងបន្ទាប់ពីអ្នកចាំទី Thibaut Courtois របស់ Chelsea ចង់ចាកចេញ ទៅលេងនៅក្លឹប Real Madrid ។ រូបគេមិនព្រមមកហ្វឹកហាត់ជាមួយសមាជិកក្រុមដទៃទៀតឡើយ នៅម្សិលមិញនេះ ដូច្នេះហើយបានជាធ្វើឱ្យក្រុមតោខៀវត្រូវការអ្នកចាំទីថ្មីម្នាក់ដែលមានសមត្ថភាពពិតប្រាកដមករួមក្រុម។ ត្បិតអីលីគកំពូលអង់គ្លេស នឹងបើករដូវកាលថ្មីនាចុងសប្ដាហ៍នេះហើយ និងទីផ្សារដោះដូរកីឡាករវិញបិទនៅថ្ងៃស្អែក។
ប្រភពនៅអង់គ្លេសបានបញ្ជាក់ថា អ្នកចាំទីវ័យ២៣ឆ្នាំរបស់ក្រុម Athletic Bilbao នឹងហោះទៅទីក្រុងឡុងនៅថ្ងៃពុធនេះ ដើម្បីពិនិត្យសុខភាព និងបង្ហាញខ្លួនជាផ្លូវការតែម្ដង។ ក្រុម Chelsea ពិតជាត្រូវការអ្នកចាំទីកំពូលម្នាក់ជាចាំបាច់ ត្បិតអីកីឡាករប៉ុន្មាននាក់ហើយដែលខ្លួនចង់បាន តែមិនអាចទិញយកបានវិញ ព្រោះសាមីខ្លួនបដិសេធមិនព្រមរួមក្រុម។
ចំពោះអ្នកចាំទី Courtois វិញ ដែលមិនព្រមមកហ្វឹកហាត់ជាមួយក្រុមនោះ រំពឹងថានឹងផ្លាស់ទៅលេងនៅ Real Madrid បានជោគជ័យ នៅមុនរដូវកាលដោះដូរកីឡាករបិទផងដែរ៕ប្រភព៖ DailyMail