Barcelona ត្រូវបានគេស្គាល់ថាជា ក្លឹបកំពូលមួយប្រចាំព្រឹត្តិការណ៍ដណ្ដើមពានអឺរ៉ុបរបស់ UEFA ដោយក្នុងប្រវត្តិសាស្ត្រពួកគេបានលើកពាន Champions League ៥ លើក European Super Cups ៥ លើក Fairs Cups ៣ លើក និង Cup Winners’ Cups ៤ លើក។
ក្លឹបយក្សនៅតំបន់កាតាឡាន់បានចូលរួមការប្រកួតពានអឺរ៉ុបលើកដំបូងបង្អស់នៅឆ្នាំ ១៩៥៥ ហើយគិតមកទល់ឆ្នាំ ២០២០ មានតែក្រុម ២ ប៉ុណ្ណោះដែលពួកគេមិនទាន់អាចយកឈ្នះបាន។
ក្នុងនោះមានក្លឹប Slovan Bratisalava របស់ប្រទេសស្លូវ៉ាគី នៅឆ្នាំ ១៩៦៩ កំឡុងការប្រកួតពាន Cup Winners’ Cup តែក្រុមនេះបានជួបតែម្តងគត់ ដូច្នេះហើយយើងរាប់តែឈ្មោះក្លឹបមួយផ្សេងទៀតប៉ុណ្ណោះ នោះគឺ Dundee United ដែលធ្លាប់ប៉ះគ្នា ៤ លើកនៅព្រឹត្តិការណ៍របស់ UEFA។
លទ្ធផលបរាជ័យទាំង ៤ លើករបស់ Barcelona ទល់ក្រុមខាងលើមានដូចតទៅ៖
ថ្ងៃទី ២៥ តុលា ឆ្នាំ ១៩៦៦ ចាញ់ក្នុងលទ្ធផល ១-២ នៅពាន Inter-Cities Fairs Cup
ថ្ងៃទី ១៦ វិច្ឆិកា ឆ្នាំ ១៩៦៦ ចាញ់ក្នុងលទ្ធផល ២-០ នៅពាន Inter-Cities Fairs Cup ជើងទី ២
ថ្ងៃទី ៤ មិនា ឆ្នាំ ១៩៨៧ ចាញ់ក្នុងលទ្ធផល ១-០ នៅពាន UEFA Cup (សព្វថ្ងៃប្តូរមកជា Europa League)
ថ្ងៃទី ១៨ មិនា ឆ្នាំ ១៩៨៧ ចាញ់ក្នុងលទ្ធផល ១-២ នៅពាន UEFA Cup ជើងទី ២៕
បញ្ជាក់ថា ក្លឹប Dundee United គឺជាក្លឹបមានអាយុកាល ១១១ ឆ្នាំមកហើយ ដោយមានមូលដ្ឋានក្នុងប្រទេសស្កុតឡែន ហើយនៅឆ្នាំ ២០២០ នេះ ពួកគេកំពុងឈរចំណាត់ថ្នាក់ទី ៦ នៅក្របខ័ណ្ឌកំពូល Scottish Premiership៕
ប្រភព៖ BeSoccer