នៅជំនួប Milan Derby ដែលជាការប៉ះគ្នារវាងក្លឹប Inter Milan និង AC Milan កាលពីថ្ងៃមុនបានបញ្ចប់ទៅនៅលទ្ធផល ១-២ ដោយគ្រាប់បាល់ជ័យជម្នះទាំងពីរនោះគឺសម្រេចបានពីសំណាក់ខ្សែប្រយុទ្ធវ័យចំណាស់ Zlatan Ibrahimovic។
ក្រោយចប់ការប្រកួតក៏មានពាក្យឌឺដងផ្លែផ្កាដែលចេញពីមាត់របស់ Zlatan បានផ្ញើទៅកាន់ Romelu Lukaku ហើយធ្វើឲ្យមានការចាប់អារម្មណ៍ជាខ្លាំងពីអ្នកគាំទ្រ។
បុរសវ័យ ៣៩ ឆ្នាំដែលធ្លាប់ចូលរួមលេងឲ្យ AC Milan ចន្លោះឆ្នាំ ២០១០ ដល់ ២០១២ កាលនោះធ្លាប់ប្រកាសក្តែងៗថា ខ្លួនគឺជា “ស្តេចបាល់ទាត់ប្រចាំទីក្រុង Milan”។ លុះរហូតដល់ខែកុម្ភៈ ឆ្នាំ ២០២០ នៅជំនួបដែល Inter បំបាក់ AC ក្នុងលទ្ធផល ៤-២ ពេលនោះ Lukaku ក៏បង្ហោះរូបភាពអមសារ Caption មួយថា៖ “ទីបំផុតមានស្តេចបាល់ទាត់ថ្មីក្នុងទីក្រុងនេះហើយ” ដែលន័យនេះចង់ថាខ្លួនអាចជំនួសតំណែងស្តេចបាល់ទាត់របស់ Zlatan បាន។
គ្រប់យ៉ាងមិនទាន់បញ្ចប់ទេ ដោយសម្រាប់ការប្រកួតកាលពីចុងសប្តាហ៍ដែល AC Milan យកឈ្នះក្នុងទឹកដីរបស់ Inter វិញនោះ ក៏ស្រាប់តែកីឡាករស៊ុយអែតនិយាយយ៉ាងឡូយលើ Twitter ថា៖ “ទីក្រុង Milan គ្មានស្តេចបាល់ទាត់ទេ ផ្ទុយទៅវិញពួកគេមានតែលោកព្រះ GOD” (បញ្ជាក់៖ GOD តំណាងឲ្យសាមីខ្លួនផ្ទាល់គឺ Zlatan Ibrahimovic)៕
ប្រភព៖ AF