នៅពេលដែលនិយាយដល់ឈ្មោះតារាបាល់ទាត់ឆ្នើមដាច់គេក្នុងលោក ក្នុងចំណោមនោះប្រាកដជាមានឈ្មោះរបស់ Lionel Messi ប៉ុន្តែតាមរយៈការយល់ឃើញរបស់អតីតមិត្តរួមទ្រនំចាស់ Barcelona គឺកីឡាករ Gerard Deulofeu បានបង្ហាញការគិតខុសពីនេះ។
ត្បិតបើធ្លាប់រួមជើងជាមួយ M10 នៅតំបន់ប្រយុទ្ធកាលពីអតីតកាល ប៉ុន្តែប្រាប់ទៅកាន់សារព័ត៌មាន Marca កីឡាករ Deulofeu បែរជានិយាយថា៖ “សម្រាប់ខ្ញុំ Ronaldinho គឺជាកីឡាករដែលល្អដាច់គេក្នុងប្រវត្តិសាស្ត្រ ដោយខ្ញុំធ្លាប់បានជួបគាត់ ខ្ញុំធ្លាប់បានទស្សនាការប្រកួតនៅឯ Camp Nou ហើយគាត់អង្គុយបន្ទាប់ខ្ញុំ វាជាបទពិសោធន៍ដ៏អស្ចារ្យមួយ”។
និយាយដល់ Messi កីឡាករដែលលេងឲ្យ Udinese បច្ចុប្បន្នក៏បន្តថា៖ “Messi ក៏អស្ចារ្យដែរ ខ្ញុំចូលចិត្តគាត់ខ្លាំងដូចគ្នា ដោយខ្ញុំបានឆ្លងកាត់ការលេងរួមជើងជាមួយគាត់រយៈពេល ៦ ខែគាត់ជាមនុស្សល្អ និងជាកីឡាករដ៏ល្អម្នាក់”។
បញ្ជាក់ថានៅអាជីពបាល់ទាត់រយៈពេល ១៧ ឆ្នាំ Ronaldinho ដែលជាកីឡាករជំនាញលេងនៅតំណែងបម្រើប្រយុទ្ធ និងស្លាបឆ្វេង រកបាន ១៩៧ គ្រាប់និង Assist ១៦២ លើកនៅ ៥៤៣ ប្រកួត៕
ប្រភព៖ GiveMeSport