ខ្សែបម្រើ Casemiro ទើបតែទម្លាយកាលពីពេលថ្មីៗនេះថាគ្រប់គ្នាបានប្រើប្រាស់ឈ្មោះរបស់ខ្លួន ខុសពីឈ្មោះពិតជិតមួយអាជីពទៅហើយ ប៉ុន្តែខ្លួនមានហេតុផលទើបជំរុញឲ្យបន្តរឿងនេះមកទល់សព្វថ្ងៃ។
បុរសវ័យ ២៨ ឆ្នាំ បានប្រលូកមកក្នុងឈុតធំជាលើកដំបូងពេលលេងឲ្យក្លឹប Sao Paulo នៅឆ្នាំ ២០១០ ហើយចុះហត្ថលេខាបន្តលេងនៅ Los Blancos នារយៈពេល ៣ ឆ្នាំបន្ទាប់។ នៅកិច្ចសម្ភាសន៍កាលពីពេលថ្មីៗនេះ កីឡាករប្រេស៊ីលនិយាយថា៖ “មិនមានមនុស្សជាច្រើនដឹងនោះទេ ដោយការពិតរបស់ខ្ញុំ ខ្ញុំមានឈ្មោះ Casimiro ព្រោះនាមត្រកូលម្តាយខ្ញុំប្រើអក្សរ I មិនមែន E ទេ”។
លោកបន្ត៖ “តែពេលលេងនៅប្រេស៊ីល កាលនោះនៅប្រកួតឲ្យ Sao Paulo មនុស្សជាច្រើនចាប់ផ្តើមហៅឈ្មោះខ្ញុំថា Casemiro ដោយនៅថ្ងៃនោះខ្ញុំលេងបានល្អណាស់ អ៊ីចឹងទើបសម្រេចចិត្តបន្តឲ្យគេហៅឈ្មោះខ្ញុំថា Casemiro ដោយមានអក្សរ E និងមកទល់សព្វថ្ងៃនេះវិញ”៕
ប្រភព៖ SoccerLaduma