Wolverhampton Wanderers ឬគេនិយមហៅថា ក្រុមកូនកាត់ព័រទុយហ្គាល់ ព្រោះក្នុងក្រុមប្រមូលផ្តុំភាគច្រើនដោយកីឡាករសញ្ជាតិព័រទុយហ្គាល់ ថ្មីៗនេះត្រូវបានគេទម្លាយថា ការចរចាចង់បាន Nelson Semedo ពី Barcelona នៅតែកំពុងដំណើរការដដែល។
ខណៈដែលទីផ្សារដោះដូរត្រូវបិទទ្វារនៅថ្ងៃទី ៥ តុលាខាងមុខ សម្រាប់ក្លឹបចចក Wolves ហាក់កំពុងដុតដៃដុតជើងជាខ្លាំង ចរចាជាមួយភ្នាក់ងារលោក Jorge Mendes ដោយត្រៀមចំណាយទឹកប្រាក់ប្រមាណ ៣០ លានអឺរ៉ូ។
បញ្ជាក់ថា កន្លងមក Wolves ក៏ទើបតែយកបានខ្សែការពារវ័យ ១៨ ឆ្នាំ Ki-Jana Hoever ពី Liverpool មួយផងដែរ ប៉ុន្តែការចង់បាន Semedo គឺចង់បន្ថែមប្រព័ន្ធការពារឲ្យរឹងមាំបន្ថែមទៀត ក្រោយពីការចាកចេញរបស់កីឡាករ Doherty ដែលផ្ទេរទៅ Spurs កាលពីពេលកន្លងទៅ៕ ប្រភព៖ BeSoccer