លោក Jurgen Klopp បានព្រមានក្រុម Leeds United ថានៅរាត្រីនេះ ពួកគេនឹងជួបក្រុមខ្លាំងបំផុតមួយ ហើយការប្រកួតបើកឆាកនេះអាចនឹងធ្វើឱ្យពួកគេមិនអាចបំភ្លេចបានថែមទៀត។ក្រុមហង្សក្រហម Liverpool នឹងត្រូវប្រកួតបើកលីគកំពូលអង់គ្លេស ទល់ក្រុម Leeds United នៅម៉ោង១១:៣០នាទីយប់នេះ។ ដោយក្រុម Leeds នេះ គឺទើបឡើងមកពីក្របខណ្ឌ Championship វិញប៉ុណ្ណោះ ក្រោយខកខានជាច្រើនឆ្នាំមកហើយ។ តែបើមើលពីប្រវត្តិវិញ Leeds United ក៏មិនមែនជាក្រុមអន់នោះដែរ។ រដូវកាលនេះ ពួកគេបានទិញកីឡាករថ្មីចូលជាច្រើន ដើម្បីត្រៀមរក្សាខ្លួនឱ្យនៅជាប់លីគកំពូលទៀត។
មុនការប្រកួតចាប់ផ្ដើម លោក Klopp អ្នកចាត់ការក្រុម Liverpool បានចេញមុខមកព្រមានដល់ក្រុម Leeds United ដែរថា៖ “ខ្ញុំបានផ្ដល់ការគោរពដល់អ្វីដែល Leeds បានធ្វើ ប៉ុន្តែការប្រកួតបើកឆាកគឺជាការប្រកួតសំខាន់។ ខ្ញុំបានដឹងថា Marcelo និយាយថា Anfield មិនដូចមុនទេពេលអត់អ្នកគាំទ្រ ហើយគាត់និយាយត្រូវហើយ។ ប៉ុន្ដែបើគិត១ទៀត វានៅតែជា Anfield ដដែល វាជាផ្ទះរបស់យើង ហើយយើងគឺជា Liverpool ។ យើងត្រៀមរូចហើយដើម្បីបង្កើតជីវិតរបស់ពួកគេមិនឱ្យមានផាសុកភាព”៕
ប្រភព៖ DailyMail