អតីតកីឡាករជើងចាស់លោក Danny Murphy បានបង្ហាញការជឿជាក់ថា Paul Pogba នឹងត្រូវចាកចេញ ប្រសិនណាក្លឹប Manchester United ពិតជាសម្រេចការនាំយក Donny van de Beek ពីក្លឹប Ajax ពិតមែននោះ។
Van de Beek បានអភិវឌ្ឍខ្លួនក្លាយជាកីឡាករដ៏សំខាន់មួយ នៅក្លឹប Ajax ហើយពីររដូវកាលមុន គេក៏ធ្លាប់ជួយឲ្យក្រុមឈានដល់វគ្គពាក់កណ្តាលផ្តាច់ព្រ័ត្រ UCL ផងដែរ។
ប្រាប់សារព័ត៌មាន talkSPORT លោក Murphy និយាយ៖ “ខ្ញុំកំពុងគិតថាតើ Van de Beek គេនឹងទៅលេងនៅតំណែងមួយណា តើអាចទេលេងព្រមគ្នាជាមួយ Fernandes និង Pogba? តើអ្នកពិតជាគិតបែបហ្នឹងមែនទេ”។
លោកសង្កត់ធ្ងន់៖ “ខ្ញុំគិតថា Pogba នឹងត្រូវចាកចេញ ការចុះហត្ថលេខានោះមានន័យថា Pogba ត្រូវចេញ ខ្ញុំមិនដឹងថាបែបណាទេ តែដូចមានអ្វីម្យ៉ាងប្រាប់ខ្ញុំថាគាត់នឹងដើរចេញ ត្បិតបើគាត់អាចលេងជាលេខ ៦ តំណែងរាងក្រោមបន្តិច ក៏ខ្ញុំថាគាត់មិនមែនជាប្រភេទខ្សែបម្រើការពារបែបហ្នឹងពេកនោះដែរ ព្រោះគាត់ចូលចិត្តផ្លាស់មកប្រអប់គ្រោះថ្នាក់ ដើម្បីសម្រេចទី”៕ ប្រភព៖ Metro