លោក Julen Lopetegui បានបញ្ជាក់ថានៅពេលនេះដល់ពេលដែលត្រូវគិតពីរឿងឈ្នះពានរង្វាន់ហើយ ក្រោយពីអាចយកឈ្នះលើក្រុម Man Utd បាននៅយប់មិញនេះ។ក្រុមអេស្ប៉ាញខាងលើបានទម្លាក់ក្រុម Man Utd បានពីវគ្គពាក់កណ្ដាលផ្ដាច់ព្រ័ត្រ ក្នុងលទ្ធផល ២-១។ ក្រោយពីអាចយកឈ្នះបានហើយ លោក Julen ដែលជាអ្នកចាត់ការក្រុមបញ្ជាក់ថានៅពេលនេះជាពេលដែលត្រូវគិតដល់ពានរង្វាន់ហើយ ត្បិតអីក្រុមរបស់លោកកំពុងបង្ហាញសមត្ថភាពគ្រប់គ្រាន់ហើយ។ ក្រុម Sevilla ឡើងវគ្គផ្ដាច់ព្រ័ត្រនេះ នឹងត្រូវប៉ះក្រុម Inter Milan ឬ Shakhtar Donetsk ដែលត្រូវប្រកួតគ្នានៅយប់នេះ។
អតីតអ្នកចាត់ការក្រុម Real Madrid ខាងលើបានបន្ថែមទៀតថា៖ “ Man Utd កំពុងមានទម្រង់លេងមួយដែលល្អបំផុតប៉ុន្មានរដូវកាលចុងក្រោយនេះ។ តែយើងអាចគ្រប់គ្រងស្ថានភាពបាន និងស្វែងរកដំណោះស្រាយដើម្បីយកជ័យជម្នះ។ ខ្ញុំសប្បាយចិត្តជាមួយកូនក្រុម អ្នកគាំទ្រ ហើយវាដល់ពេលដែលយើងត្រូវគិតពីពានរង្វាន់ហើយ”៕