ក្រោយរងភាពអាម៉ាស់នៅលទ្ធផល ៨-២ ទល់ Bayern Munich ប្រធានបទពាក់ព័ន្ធនឹងការធ្លាក់ចេញរបស់ Barcelona ទំនងនឹងក្លាយជារឿងដ៏គួរឲ្យចាប់អារម្មណ៍បំផុតមួយប្រចាំ UEFA Champions League រដូវកាលនេះ។
Barcelona បានខកខានជាច្រើនលើកច្រើនសារ នៅរយៈពេលប៉ុន្មានឆ្នាំចុងក្រោយ ខណៈដែលពានអឺរ៉ុបលើកចុងក្រោយដែលក្រុមបានឈ្នះ ខកខានតាំងពី ៥ ឆ្នាំមុនមកម្ល៉េះ។ តាម Sportskeeda បានបង្ហាញភាពឈឺចាប់ធំៗ ៤ លើក នៅរយៈពេលបួនឆ្នាំចុងក្រោយ ដែលអ្នកមានបុណ្យធ្លាប់ជួបប្រទះ៖
៤) Juventus ៣-០ Barcelona រដូវកាល ២០១៦/១៧
នៅរដូវកាល ២០១៦/១៧ គ្រានោះបើនិយាយពីវគ្គ ១៦ ក្រុម ក្លឹប Barcelona បានបង្កើតអភិនិហាដ៏អស្ចារ្យ ក្រោយយកឈ្នះលើ PSG នៅលទ្ធផល ៦-១ នាជើងទី ២ ពោលគឺផ្តួលក្រុមបារាំងឲ្យធ្លាក់ចេញទាល់តែបាន ត្បិតបើជើងទី ១ PSG ស៊ីមុន ៤-០ ក៏ដោយ។
លុះឆ្លងដល់វគ្គបន្ទាប់ជាមួយ Juventus អ្នកមានបុណ្យបែរជាទទួលលទ្ធផលមិនល្អវិញ ដោយជើងទី ១ ត្រូវម្ចាស់ដីលុត ៣-០ ស្វាគមន៍ ហើយជើងទី ២ ធ្វើអ្វីសេះបង្កង់មិនចេញ បានត្រឹមហាលអាវត្រលប់ទៅផ្ទះ។
៣) AS Roma ៣-០ Barcelona រដូវកាល ២០១៧/១៨
វាជារឿងដែលមិននឹកស្មានមួយ ដែលក្រុមខ្លាំងនៅអេស្ប៉ាញមកធ្លាក់ក្រោមថ្វីជើងក្រុម AS Roma របស់អ៊ីតាលី។ នៅជើងទី ១ អ្នកមានបុណ្យនាំមុខ ៤-១ លុះដល់ជើងទី ២ Roma លុតវិញ ៣-០ ត្បិតសរុបលទ្ធផលគ្រាប់បាល់ស្មើ ប៉ុន្តែ Roma មានគ្រាប់បាល់ចំណេញក្រៅដីមួយគ្រាប់។
២) Liverpool ៤-០ Barcelona រដូវកាល ២០១៨/១៩
ជាមួយ Liverpool ឆ្នាំទៅ ក៏កាន់តែឈឺចាប់ នោះការវាយបកមិននឹកស្មានដល់ ខណៈដែលជើងទី ១ Barcelona យកឈ្នះ ៣-០ យ៉ាងផុយទៅហើយ តែបែរជាជើងទី ២ នៅឯទឹកដីមរណៈ Anfield ក្រុមអង់គ្លេសបង្ហាញទម្រង់លេងល្អហួស យកឈ្នះក្រុមអេស្ប៉ាញ ៤-០ វិញ ហើយវាក៏ជាឆ្នាំ ដែល Barca ជួយបើកផ្លូវឲ្យហង្សស្គាល់រសជាតិពាន UCL ក្រោយខកខាន ១៤ ឆ្នាំផងដែរ។
១) Barcelona ២-៨ Bayern Munich រដូវកាល ២០១៩/២០
ទើបកើតឡើងថ្មីថ្មោង ដែលឆ្នាំនេះគឺប្រកួតតែមួយជើងប៉ុណ្ណោះ ធ្វើឡើងនៅទឹកដីប្រទេសព័រទុយហ្គាល់ ហើយវាក៏ជាប្រវត្តិសាស្រ្តថ្មីមួយបន្ថែមទៀត កប់ឈ្មោះ Barcelona ឲ្យកាន់តែធ្លាក់ក្នុងស្ថិតិអាក្រក់។
៨-២ ក្លាយជាប្រធានបទគ្រាប់បាល់ផ្ទុះការជជែកវែកញែកពេញប្រព័ន្ធអ៊ីនធឺណិត ហើយអ្វីដែលកាន់តែអាម៉ាស់គឺ Pihlippe Coutinho ដែលជាអ្នករកបាន ២ គ្រាប់ ជាអតីតកីឡាករដែលក្រុមបោះបង់នោះ មកក្លាយជាចំណែកសំខាន់ផ្តួល Barca នៅយប់នោះផ្ទាល់តែម្តង៕
ប្រភព៖ Sportskeeda