ក្នុងចំណោមគូដែលត្រូវប៉ះគ្នានៅវគ្គ ៨ ក្រុមចុងក្រោយ UEFA Champions League នឹងមានជំនួបដ៏ក្ដៅគគុកមួយ រវាង Barcelona និង Bayern Munichត្រូវតតាំងគ្នានៅថ្ងៃសោរ៍ ទី ១៥ សីហាវេលាម៉ោង ០២:០០ នាទីរំលងអាធ្រាត្រ មានផ្សាយផ្ទាល់លើទំព័រ CTS Sports។
មុនឈានដល់ការប្រកួត CTS Sports បង្ហាញរឿងសំខាន់ ៤ យ៉ាងដែលអ្នកគាំទ្រគួរដឹង ដើម្បីញាំងឲ្យការទស្សនា ការប្រកួតដ៏ពិសេសនោះកាន់តែជក់ចិត្តដិតអារម្មណ៍។
៤) ជាក្រុមដែលឈ្នះពាន UCL ៥ សម័យកាលដូចគ្នា
ក្រុមទាំងពីរសុទ្ធសឹងជាក្រុមដែលបានឈ្នះពានអឺរ៉ុប UEFA Champions League ឬ European Cup ចំនួន ៥ លើកដូចគ្នាក្នុងប្រវត្តិសាស្ត្រ ដោយលើកចុងក្រោយដែល Bayern ឈ្នះនៅឆ្នាំ ២០១៣ រីឯលើកចុងក្រោយរបស់ Barcelona នៅឆ្នាំ ២០១៥។
៣) ស្ថិតិនិងការជួបគ្នារវាងក្រុមទាំងពីរ
Barcelona ធ្លាប់ជួបក្រុម Bayern Munich ចំនួន ១០ លើក ក្នុងនោះទទួលបានជ័យជម្នះ ២ លើក ស្មើ ២ លើក និងបរាជ័យ ៦ លើក។ រាប់តែនៅ UCL សុទ្ធ ក្រុមអាល្លឺម៉ង់មានភាគរយឈ្នះទៅលើក្រុមអេស្ប៉ាញច្រើនជាង ដោយធ្លាប់ប៉ះគ្នា ៤ ប្រកួតនៅវគ្គពាក់កណ្ដាលផ្ដាច់ព្រ័ត្រ ២ ប្រកួតនៅវគ្គ ៨ ក្រុម និង ២ ប្រកួតនៅវគ្គចែកពូល។
ប៉ុន្តែនៅវគ្គ ៨ ក្រុមនេះផ្ទាល់ក្លឹបទាំងពីរធ្លាប់ប៉ះគ្នាប្រកួតពីរជើងម្តង នៅរដូវកាល ២០០៨/០៩ ហើយជាលទ្ធផលគឺ Barcelona យកឈ្នះសរុបគ្រាប់បាល់ ៥-១។ លើកចុងក្រោយក្រុមទាំងពីរជួបគ្នាកើតឡើងកាលពី ៥ ឆ្នាំ មុនពេលក្លឹបកាតាឡាន់យកឈ្នះ Bayern សរុប ៦-២ ឡើងទៅកាន់វគ្គផ្តាច់ព្រ័ត្រ UCL។
ដោយឡែកមកមើលស្ថិតិនៅរដូវកាល ២០១៩/២០ សម្រាប់ក្របខ័ណ្ឌ UCL ផ្ទាល់ គឺ Bayern នាំមុខដាច់តែម្តងទាំងការរកគ្រាប់បាល់មានដល់ ៣១ គ្រាប់ ហើយការស៊ុតចំគោលដៅសរុបមាន ៧៧ លើក និងឈ្នះទាំង ៨ ប្រកួតដែលបានឆ្លងកាត់ ធៀបនឹង Barcelona រកបានតក់ៗត្រឹម ១៣ គ្រាប់ និងឈ្នះ ៥ ស្មើ ៣។
២) ការប្រៀបធៀបសមាសភាពកីឡាករ
នៅតំបន់ការពារ សម្រាប់ Barcelona កីឡាករដែលជាក្តីសង្ឃឹមធំបំផុតនោះគឺ Gerard Pique និង Sergio Busquets ស្របពេលដែល Bayern Munich រយៈពេលចុងក្រោយគូប្រជែងភាគច្រើនបារម្ភខ្លាំងជាមួយយុវជនឡើងជើង Alphonso Davies និង Joshua Kimmich។ តាមភាពជាក់ស្ដែងគេមើលឃើញថាប្រព័ន្ធការពាររបស់ Bayern មានប្រៀបជាង Barcelona។
រំកិលឡើងផុតទៅតំបន់ប្រយុទ្ធ ក៏ជារឿងដែលត្រូវជជែកគ្នាផងដែរ ជាពិសេសគឺ Lionel Messi និង Robert Lewandowski សុទ្ធសឹងតែធ្វើបានល្អប្រហែលគ្នានារដូវកាល ២០១៩/២០ នេះ។ ចាក់ឲ្យស៊ីជម្រៅបូកបញ្ចូលគ្រាប់បាល់នៃខ្សែប្រយុទ្ធពីររូបរបស់ក្រុមនីមួយៗគឺ Bayern មាន Lewandowski+Gnabry សរុបរកបាន ៧៣ គ្រាប់ហើយ រីឯ Barca មានមិត្តយល់ចិត្ត Messi+Suarez សរុបទើបរកបាន ៥១ គ្រាប់ប៉ុណ្ណោះ (នេះជាគ្រាប់បាល់គ្រប់ការប្រកួតក្នុងនិងក្រៅលីគ)។ ជារួមនៅតំបន់ប្រយុទ្ធក៏អាចថា Bayern មានប្រៀបជាង Barcelona ផងដែរ។
១) កំណត់ត្រាដែលអាចនឹងកើតឡើង
ប្រសិនណា Barcelona ទទួលជោគជ័យនោះ ពួកគេនឹងអាចឡើងទៅកាន់វគ្គ ៤ ក្រុមចុងក្រោយ ពីររដូវកាលជាប់គ្នា ដែលខកខានកើតមានតាំងពីចន្លោះឆ្នាំ ២០០៨-២០១៣។
ផ្ទុយទៅវិញប្រសិន Barcelona រងបរាជ័យ នោះ Bayern នឹងបន្តឈរកំណត់ត្រាជាក្រុមតែមួយគត់ដែលផ្តល់បរាជ័យច្រើនបំផុតដល់ក្រុម Barcelona ដោយស្ថិតិកន្លងមករុញឲ្យ Barca ចាញ់ ៥ លើកទៅហើយនោះ។
មួយផ្សេងទៀតសម្រាប់កីឡាករផ្ទាល់ គឺ Lewandowski គេមាន ៦៦ គ្រាប់ទើបយកឈ្នះ Benzema នាមកីឡាកររកបានគ្រាប់បាល់ច្រើនបំផុតនៅ UCL ហើយក៏មានឱកាសបន្តស្វែងរកគ្រាប់បាល់នាំមុខ Raul ឈរជាកីឡាករលំដាប់ទី ៣ ដោយអតីតវីរបុរស Madrid ធ្វើបាន ៧១ គ្រាប់៕