ការប្រកួត UEFA Champions League នឹងត្រលប់មកវិញនៅថ្ងៃទី ៧ សីហាខាងមុខនេះ ដោយកីឡាករសំខាន់ៗជាច្រើនអាចនឹងត្រូវអវត្តមាន ក្រោយរងបញ្ហារបួសនៅប្រកួតនារយៈពេលចុងក្រោយ។
ក្នុងនោះ PSG គឺមានដំណឹងច្បាស់ការហើយថា Kylian Mbappe នឹងត្រូវខកខានការប្រកួតទល់ Atalanta ស្របពេលដែល Man City ត្រូវខូចជើង Sergio Aguero ជាកីឡាករលេងនៅតំណែងប្រយុទ្ធដ៏សំខាន់ ហើយក្រុមដែលត្រូវតតាំងគឺ Real Madrid កំពុងមិនទាន់ប្រាកដប្រជាពីវត្តមានរបស់ Eden Hazard ក្រោយរងរបួសកជើង។
ដោយឡែកសម្រាប់ Atletico Madrid ដែលត្រូវតតាំងជាមួយក្លឹប RB Leipzig នាវគ្គ ៨ ក្រុមចុងក្រោយ ក៏ទំនងជាត្រូវអវត្តមានខ្សែបម្រើដ៏សំខាន់នោះគឺ Thomas Partey។ ក្រឡេកទៅមើល Barcelona គឺ Ousmane Dembele និង Samuel Umtiti ប្រហែលនឹងមិនអាចបង្ហាញខ្លួនបានទេ ដូចគ្នាទៅនឹង Clement Lenglet ដែលរងរបួសក្រលៀន រុញឲ្យការរៀបប្រព័ន្ធការពារក្រោមការដឹកនាំរបស់ Setien អាចជាពិបាកខ្លាំង។
ចំណែកឯ Bayern Munich ត្បិតបើកំពុងឡើងកូដខ្លាំង តែតំណែងការពារក៏អាចនឹងចន្លោះប្រហោង Benjamin Pavard ផងដែរ បន្ទាប់ពីរងរបួសកជើងនៅអំឡុងពេលហ្វឹកហាត់កន្លងទៅ។ ចុងក្រោយគឺ Juventus ពាក់ព័ន្ធ Paulo Dybala ក៏ធ្វើឲ្យគ្រប់គ្នាកំពុងព្រួយបារម្ភ ក្រោយពេលដែលគេត្រូវប្តូរចេញនៅប្រកួតប៉ះ Sampdoria ហើយទំនងជាមិនស្រួលនៅផ្នែកជើងខាងឆ្វេង៕
ប្រភព៖ AF