Arthur បានសម្រេចការផ្ទេរទៅលេងនៅក្រុម Juventus ហើយ ប៉ុន្តែរូបគេត្រូវរង់ចាំរហូតដល់ចប់រដូវកាលនេះសិន ទើបអាចចូលហាត់និងពេញសិទ្ធិបាន។
ដោយបច្ចុប្បន្ននេះ កីឡាករប្រេស៊ីលនៅជាមួយក្រុម FC Barcelona សិនទេ ព្រោះការប្រកួតរដូវកាលនេះមិនទាន់បញ្ចប់ នៅសល់ UEFA Champions League មួយទៀត។ ត្បិតតែយ៉ាងនេះក្ដី សាមីខ្លួន Arthur បានបដិសេធឈប់លេងឱ្យក្រុមអ្នកមានបុណ្យហើយ ក្នុងការប្រកួតនៅសល់ទាំងអស់រដូវកាលនេះ។ ដូច្នេះ ការប្រកួតទល់ក្រុមNapoli ជើងទី២ នាខែក្រោយនេះ នឹងមិនមានវត្តមានរបស់ Arthur ឡើយ។
ការនិយាយបែបនេះ គឺដោយសារតែលោក Setien លែងប្រើប្រាស់រូបគេទៅហើយ នៅប៉ុន្មានប្រកួតចុងក្រោយនេះ។ ដូច្នេះហើយ កីឡាករវ័យ២៣ឆ្នាំនេះក៏សម្រេចចិត្តឈប់លេងឱ្យ Barcelona តែម្ដង ដើម្បីកុំឱ្យមានភាពមិនល្អនឹងគ្នាកើតឡើង ព្រោះរូបគេនៅ ក៏មិនដាក់ឱ្យលេងដដែល៕ប្រភព Dailymail
