សហព័ន្ធបាល់ទាត់អន្តរជាតិ FIFA បានប្រកាសនៅយប់មិញថា ការប្រកួតពានរង្វាន់ Women World Cup 2023 នឹងធ្វើឡើងនៅប្រទេសអូស្ត្រាលី និងនូវែលហ្សេឡង់។
ការដេញថ្លៃធ្វើជាម្ចាស់ផ្ទះ Women World Cup 2023 ដំបូងឡើយ មានចិននិងជប៉ុន ជាប្រទេសដែលមានភាគរយខ្ពស់ជាងគេ។ តែដោយសារប្រទេសនៅអាស៊ីមួយនេះ បានសម្រេចចិត្តដកខ្លួនចេញ ទើបបានជាអូស្ត្រាលី និងនូវែលហ្សេឡង់មានភាគរយខ្ពស់ជាងគេវិញ ខណៈដែលកូឡុំប៊ី នៅអាមេរិកខាងត្បូងនោះ ក៏បានដាក់ឈ្មោះចូលរួមដូចគ្នា។ ក្រោយពីធ្វើការបោះឆ្នោតសម្រេចមក កាលពីយប់មិញនេះ លទ្ធផលបានចេញមកថា អូស្ត្រាលី និងនូវែលហ្សេឡង់ជាអ្នកឈ្នះ និងទទួលបានសិទ្ធិក្នុងការរៀបចំ។
រំលឹកថាការប្រកួត Women World Cup 2023 នឹងមានការប្រែប្រួលបន្តិចពីការប្រកួតកន្លងទៅ ដែលមានក្រុមចូលរួមត្រឹមតែ២៤ក្រុមប៉ុណ្ណោះ។ តែសម្រាប់ឆ្នាំ២០២៣ខាងមុខវិញ នឹងតំឡើងឱ្យមានដល់ទៅ៣២ក្រុម ដូចព្រឹត្តិការណ៍ World Cup បុរសដែរ។ ការប្រកួតនឹងចាប់ផ្ដើមពីចន្លោះខែកក្កដាដល់សីហាឆ្នាំ២០២៣៕ប្រភព Bbc