មានដំណឹងលេចលឺថា Philippe Coutinho មានបំណងចង់វិលត្រលប់ទៅកាន់ទ្រនំចាស់នៅឯទឹកដី Anfield វិញនារដូវកាលក្រោយ បន្ទាប់ពីមិនទទួលបានជោគជ័យទាល់តែសោះជាមួយក្លឹប Barcelona ដែលលោកបានផ្ទេរមកចូលរួមអស់រយៈពេលជាង ២ ឆ្នាំមកហើយ។
អតីតកីឡាករខ្ចីជើងឲ្យ Bayern រូបនេះ ក៏នឹងព្រមកាត់បន្ថយថ្លៃពលកម្មដែលខ្លួនកំពុងទទួលបានក្រាស់ក្រែលនៅ Barcelona ឲ្យតែបានផ្ទេរទៅ Liverpool ដែលធ្លាប់ជាកន្លែងជួយឲ្យលោកប្រែក្លាយជាខ្សែបម្រើលេចធ្លោមួយរូបនៅអឺរ៉ុប។
បច្ចុប្បន្ននៅកាតាឡាន់ Coutinho រកបានប្រមាណ ២៥០ ០០០ ផោន/សប្តាហ៍ ដែលច្រើនជាងប្រមាណ ៥០ ០០០ ផោនឯណោះ បើធៀបនឹងថ្លៃពលកម្មចាស់កាលលោកទទួលបាននៅ Anfield។
ផ្សាភ្ជាប់នឹងរឿងរ៉ាវនេះ ភ្នាក់ងាររបស់ Coutinho គឺលោក Kia Joorabchian ក៏ធ្លាប់និយាយដែរថា Premier League ជាកន្លែងដែល Coutinho គេរីករាយនឹងលេងបំផុត ហើយក៏អាចនឹងត្រលប់ទៅទីនោះវិញដែរ៕
ប្រភព៖ SoccerLaduma