ការប្រកួតនៅ Premier League នឹងត្រលប់មកវិញនៅពាក់កណ្តាលសប្តាហ៍នេះ ដោយជំនួបបើកឆាកសម្រាប់ Liverpool គឺត្រូវតតាំង Everton នៅថ្ងៃទី ២២ មិថុនា វេលាម៉ោង ០១:០០ នាទី នៅឯកីឡដ្ឋាន Goodison Park។
បើនិយាយពីលំដាប់ពិន្ទុដែលអាចជួយឲ្យ Liverpool ឈ្នះពានស្វ័យប្រវត្តិនោះ គឺត្រូវការ ៦ ពិន្ទុបន្ថែមទៀត ពោលគឺប្រកួតសេសសល់ទាំង ៩ ធ្វើបែបណាឈ្នះឲ្យបាន ២ ប្រកួត (បច្ចុប្បន្នហង្សនាំមុខមេឃខៀវ ២៥ ពិន្ទុ)។
នៅលក្ខខណ្ឌអាចជួយឲ្យហង្សឈ្នះពានលឿនបំផុតមាន ២ គឺ ១) ប្រសិនណានៅជំនួបទល់ Everton ក្រុមរបស់លោក Jurgen Klopp អាចយកឈ្នះបាន ៣ ពិន្ទុទៅលើម្ចាស់ផ្ទះ និងជួនពេលដែល Man City ត្រូវបរាជ័យជាកំហិតក្រោមថ្វីជើងរបស់ Arsenal នៅថ្ងៃទី ១៨ មិថុនានេះ។
ប៉ុន្តែនៅលក្ខខណ្ឌទី ២) ករណីដែល City ឈ្នះឬស្មើ Arsenal នោះ Liverpool អាចនឹងសម្រេចនាមក្លាយជា ម្ចាស់ជើងឯកប្រចាំរដូវកាល ១៩/២០ នៅប្រកួតបន្ទាប់ទល់ Crystal Palace នៅថ្ងៃទី ២៥ មិថុនា (រំលងបីថ្ងៃបន្ទាប់) នៅលក្ខខណ្ឌដែលហង្សឈ្នះ ហើយបើទោះបី City ឈ្នះបែបណាក្តី ក៏ការនាំមុខពិន្ទុរបស់ហង្សនៅប្រកួតនោះ នៅតែមានភាពគ្រប់គ្រាន់អាចសម្រេចឲ្យហង្សឈ្នះពានបានដដែល។
លក្ខខណ្ឌដែលមិនងាយនឹងកើតមានឡើង ហើយអាចរុញឲ្យ Liverpool ខកខានឈ្នះពានរដូវកាលនេះ លុះត្រាណាតែ ៩ ប្រកួតសេសសល់ហង្សមិនអាចឈ្នះដល់ ២ ប្រកួត ហើយ Man City លេងឈ្នះគ្រប់ប្រកួតទាំងអស់ នោះទើបធានាបាន ១០០ ភាគរយថាពាន PL ត្រូវបង្វែរឲ្យទៅក្រុមរបស់លោក Pep Guardiola វិញ៕